Няръяна Ӈэрм
Кампулуˮ ӈомтапишˮ
Шанат тэмсˮ нешаˮ ӈокна ӈайваӈашˮ. Пуровскийʼ районхана кампулуˮ ӈомтапишˮ. Таӆкахана экологическийʼ акцим «Особенности национальной уборки» мэӈашˮ. Чики хома шеӆ дяӈ тамна мэта, фондʼ «Компас» шеӆтамы.
Таӆкаӈ кӭвхана ӈайта паркан «Северный очаг» шитчетʼ дюӆˮ ӈок нешаˮ ӈомашˮ. Чики парким навэт тадёмшей хомяхамтанаӈатуӈ. Четаӈ деты мят меӈашˮ, ӈыдиˮ ӈамыдётуӈ, ненэй мятутуӈ несымана ӈамтаныˮ. Таӆям хомана дямтоӈ вылтымпитуӈ. Мятуˮ миӆьш кадимайтун латкуˮ, матуӆмыˮ пяˮ пеӆяˮ, веш канькуˮ — таӆьша кампулуˮ таньняна ӈомтапишˮ.
Чикиӈ камна пяˮ помна дятэӆьш диӈ пен кампулкат вылтымпишˮ. Таньняна ӈайванаˮ нешадиˮ меӆ кэӆкамаӈ тайхана акцимтоӈ вильтамна мэӈатоньш. Чики дяӆяхана «Северный очаг» паркхана куӆкаӆиˮ ӈамыдюˮ шеӆтаӈашˮ. Экологический' викторинаˮ тадяӈашˮ, кампулуˮ шеӆкта дян ӈомтапëмаӈ деʼэмня ӈайта мастер-классʼ шеӆтаӈашˮ. Таӆкахат мэнаˮ таӆанаˮ, кынутаˮ коллективыˮ вильта концертʼ ӈычимчеӈашˮ. Чики дяӆяхана кампулуˮ ӈомтапётаˮ хомана нетуӈ нятадятоньш. Ӈомтамайтуӈ нючаӆка кампулотоӈ паткуˮ мюӈ пытуӆʼкадя ӈопт мэштутоньш. Ӈаӆка пяˮ, вешˮ канькуˮ чики минхантуӈ машенʼканхана ӈатан тайваштутоньш. Няхаӆ часʼ кампулуˮ ӈомтапётаˮ мансӆаӈашˮ. Четʼдяӈкня гектарʼ мян дяӈ пен кампулкат вылтаӈашˮ. Ӈопшеӆ няхаӆдюˮкат ӈука тоннаˮ кампулуˮ ӈомтаӈашˮ. Кампулуˮ ӈомтапё дёӆьшимахататоӈ, ӈайвачетуӈ хитаӆамахатоӈ паркан ӈомыˮ нешадеˮ чупей каӆяӈ выдихина мячинӆаптадятоньш.
Чикиӈ пут тум чудиӈашˮ, капидиˮ обрядʼ «Сила чистоты» ӈычимчеӈашˮ. Пуровскийʼ район чеӆˮ диӆишатуӈ дямтуӈ хомяхамтапёш пон ӈука ӈамым шеӆташтуˮ. Кампулуˮ ӈомтапёмыˮ нешаˮ маньштуˮ, таньше ӈокна дямтуӈ кампулкат вылтампюматоӈ дёльше хома.
Андрей Пяк патмы
Авторы
Няръяна Нгэрм
Темы