Няръяна Ӈэрм
Канʼтатуӈ миԓяˮ
Чейня, недяӈк маԓьшаӈ каймяхат, Пуровскийʼ районхана диԓинаˮ петаԓаӈ нешаˮ мякна ӈайта ӈайвачетуӈ пяштуˮ. Шапаԓчеԓвунотуӈ, паԓыӈотуԓвонутуӈ куптат хоштуˮ. Канʼтатуӈ миԓьштуˮ, тытуӈ пят шеԓташтуˮ, мятуӈ ӈут матоԓьштуˮ, шапаԓьштуˮ, ԓампататуӈ миԓьштуˮ, ӈай ӈыдиˮ дилхантуӈ, мансдяхантуӈ таԓанахаˮ ӈамыкотуӈ шеԓташтуˮ. Пентаʼ неԓьшут, тамна наԓаӈ няна чепяштуˮ. Мыдюй наԓакомна пентамайтуӈ петоӈ тыӈ канʼхана, бураныхина дëтэхатуӈ тайваштутуӈ.
Тайˮня вынуӈ вайнаптамантуӈ дëԓьшкана чикитоӈ миԓьш чепяштутуӈ. Куки ӈайвачетоӈ манԓе недяӈк маԓьшаӈ неԓьня дëԓьшештутуӈ. Мансԓаш, диԓеш мэтататуӈ шаӈкмян ӈамытатоӈ — канʼтатуӈ, ԓампататуӈ, ԓапятатуӈ, ваԓьӈанутатуӈ, кадяԓтатуӈ выӈкна диԓинаˮ нешаˮ каԓьтуӈ нэхэханантуӈ пяхат шеԓташтуˮ. Чейня, ӈаԓкаˮ дячапëчиˮ каймяхат ӈай миԓьш чепяштуˮ. Ӈамыԓим миԓпнантоӈ меркам нишʼтуˮ мэсˮ, хӭмхана канспëхадя мештутуӈ. Ӈутаӈ чеԓвахана ӈамыԓитоӈ дёԓьшештутуӈ. Таӈичуӈ дямпан шанат канʼнуˮ мештуˮ. Канʼ мыдю ӈӭймята меԓьмана, хомана шеԓтамахат ӈа. Канʼ мема — хаʼта мансдя. Канʼ шеԓтамам дехеԓана нешаӈкна неньшаԓ ниӈа.
Нешаˮ тамна нючаӈэ миԓьш тохоштуˮ, таԓям мемытуӈ канʼнутоӈ меԓят ӈӭштуˮ. Миԓьш чедимяна нешаӈ ӈамтамы канʼ меԓь ӈӭймянта камна мыдю, шетши. Касаӈ ӈайтаԓë мэта канʼ ниӈ канʼхат каймаԓка. Ниӈ мээвта канʼ кунтата дямпой, канʼта мюй ӈаԓкаӈпой. Неӈиˮ таԓям канʼнутоӈ дямпой ӈӭштуˮ, чешчахана нитуӈ каньмаӈ тайхана канʼӈутуӈ ниӈ пис ӈамташтуˮ. Мюшаԓтаˮ нешаˮ шанат канʼнутуӈ ӈӭштуˮ.
Дяԓиˮ тахана мэчитуӈ канʼнутуӈ камна мятуӈ ӈамыкуˮ тайвапёш мэчитуӈ канʼӈутуӈ ӈука ӈӭштуˮ. Ӈуту, шипу, пяйканʼ, пӭӈӈайшаӈ, шоԓишаӈ канʼ –шаӈкмян ӈамыдëтуӈ канˮ тотуӈ нимитуӈ. Куԓка канʼ куше мемам меԓь нешаˮ хомана каматымпитуӈ. Ӈуп таӈичохона миԓтаˮ нешаˮ шанат канʼнуˮ шеԓташтуˮ. Пяхат мемы канʼ шетши, таԓям нешаˮ таԓьша канʼӈуˮ мэш таӈичохоԓтыхина ӈайтаԓëштуˮ.
Кукиˮ нешаˮ каԓита мансԓаӈаˮ, дяԓиˮ тахана ӈамыԓим шеԓтапë ӈудютуӈ дякоштуˮ. Таԓям хыԓаӈ каˮаммаӈ дëԓьшат дянапомна миԓьштуˮ. Хыԓан маньԓе деты шеԓтамайтуӈ канʼнутоӈ мэшʼтутуӈ.
Андрей Пяк патмы
Авторы
Няръяна Нгэрм
Темы