Няръяна Ӈэрм
Кашемʼдюԯˮ хампԯяӈк пота кайны
Чуки диԯиӈ дючимты дяԯяхана маняˮ Ямало-Ненецкий автономныйʼ округма кашемʼдюԯˮ хампԯяӈк пота кайны. 10 декабрьхана 1930 похона ӈычимы, чуки похона юбилейта ӈайты. Неԯьчеэй няна Ямало-Ненецкий национальныйʼ округӈӭ пачумай, административный центрʼта Обдорск ӈаймай. Няхаԯ пуӈ кӭймяхат чики каԯтуʼудим Салехардӈэ нимчимайтуӈ.
Маняˮ петаԯахана диԯина нешаӈэ ватаханана Хаԯяӈкаԯват. Чикехет 1938 похона Хаԯяӈкаԯват ӈаԯка каԯватӈэ патмайтуӈ. Округма неԯьчеэй дюˮ похонанта шанат областьхиˮ тонԯюмай — Уральскийʼ, Обско-Иртышскийʼ и Омский ӈӭштомай. Чикиӈ пут 14 августхана 1944 похона Тюменский область дет тасԯыш. Ямало-Ненецкий автономный округӈӭ 1977 похона кадяш. Маняˮ Ямал дяханана неԯьчеэй каԯватˮ шеԯтапёш чепьмантуӈ дёԯьшкана Ӈэԯмʼ чеԯˮ нешаˮ ӈука ӈайвачиˮ шеԯтапёштомайˮ. Пяйˮ мятуˮ миԯьштомай, мятуˮ пиˮ тыӈканханаˮ, пяйˮ ӈаноханаˮ тайвапёштомай. ԯушиˮдятынԯаштомайˮ, пэнтдиˮ тайвапёштомайˮ.
Четаӈ ЯНАО дёԯьше ӈаԯка. Ӈукадём дянта педяԯ Полярныйʼ круг чена ӈа. Округханана шичадяӈкня муниципалитет — хампԯяӈк шеԯктуӈ тонԯюта каԯват, шеӭв районˮ. ԯакхай похотыˮ шаӈкмян каԯтуˮ таамна куԯкаԯиˮ ӈаԯка пӭй мят ӈычимяˮ. Маняˮ дяма — тэта регионʼ, ӈамэхеԯта ниʼ дику. Тэта ӈӭйвсута округхана диԯина нешаӈкат ӈа. ЯНАОхана ӈопшеԯ хампԯяӈкдюԯ дёнаԯкат ӈука нешаˮ диԯиӈаˮ. Ямалханана шанат тэмс нешаˮ хома шоньшахана нетуӈ няш диԯеˮ. Выӈкна, петаԯахана диԯинаˮ ненэй нешаˮ, тасам капиˮ, капиˮ, ӈысмаˮ каԯитаӈаˮ, тыˮ падеԯьш мансԯаӈаˮ. Округханана ӈопшеԯ матʼдюԯˮ деӈаԯкат ваʼтаˮ тыˮ. Ӈэԯмʼ чеԯˮ нешаˮ кукитоӈ тамна мюшаԯяˮ, шиниӈкуй ниԯинатуӈ минԯемы дилм минԯе выӈкна диԯиӈаˮ.
Ямална юбиледян шанат каԯтыхинаˮ хомана ӈанатамэт. Пюԯ дяхана ӈукаˮ мероприятииˮ таньдет ӈайта шеԯтаны. Таԯкахана маньԯе округна юбилейʼ дет ӈайта ӈамыдётоӈ мэʼэԯдятуӈ. Дяхаӈ ԯаӈк няна Набережной Саргина татма шатуˮ ӈытуԯмайˮ. Музейʼ шеԯтамы фотовыставкахана «Район в кадре» куԯкаԯиˮ татма тадяӈаˮ.
Чикиӈ камна культурахана мансԯаннаˮ ӈай ӈыдиˮ вильта, округна деʼэмня ӈайта ӈамыдюˮ шеԯтаныˮ. Таԯкахана спектакль «Героями не рождаются» ӈычимченыˮ. Ӈаԯдя ӈашкиˮ ӈупчики таньдет ӈанатыˮ. Шанат тэмс ӈашки нешаˮ вильта иммерсивныйʼ спектакль «Голос ветра. Сон легенды» ӈокна шеԯтапиˮ. Чикиԯи ниӈа, куԯкаԯиˮ ӈычимченыˮ. Пюԯдяӈ чеԯˮ округтуӈ дяԯям хомана мэтӈатуӈ.
Андрей Пяк патмы
Татма: Андрей Пяк таттамы
Авторы
Няръяна Нгэрм
Темы