Няръяна Ӈэрм
Князьпохолкана тёнякоʼ няньмʼ ӈорӈаваць
Яʼ мидыхыд хартоʼ яхаˮнатоʼ иленаˮ тянё толырмʼ мэта ненэцяˮ пилюˮ ирыʼ 9 яля ненадо ялядонзь. Ямалнаˮ тиӈгывна хэбидя яляндоʼ едʼ хуркари сава серо тидхалембиць. Маняˮ «Няръяна Ӈэрм» газетанаˮ терӈэ Горнокнязевскхана мядоӈаваць. Намдавэваˮ, манэˮмэваˮ ӈока.
Сямянхат илекадоʼ ӈаварˮ пирембадиˮ пирдырмась. Пиревыˮ ӈаврадоʼ ӈадимдеванзь тодоˮ мядʼ терˮ маˮлёвыць. Пилиˮ нерденаӈэ Тамара Семёновна Куйбинаʼ хэванʼ тэвыдамзь. «Сидя вадамʼ мэˮӈадмʼ. Небями — не Тусиды. Нисями — хаби. Тедаʼ евэйӈэ пиреванда халэни маторпидмʼ, хобдоʼ хаˮаврамбин. Таремʼ мерʼ пиӈгуˮ. Тандаярка халямʼ хадабадиˮ яляхана ӈаниʼ пирдыртиˮ поӈгана мэдамзь. Тамальӈгана ютуˮ евэймʼ яӈэ пиредамзь. Нядэнаˮ ненэцяˮ невхы илаӈгана нараʼ няна халя, ӈамза яӈговаʼ мальӈгана тарцямʼ пирембасетыˮ».
Хубтаркахад сидя илебей немʼ манэˮӈадмʼ ненэй некоцяхаʼ ӈэвэхэʼ. «Ябтоʼ евэймʼ пирембиниʼ. Салехардʼ терниʼ. Мань нюмми — Окотэтто Ольга. Не нями — Александра. Сидниʼ нядабадахаʼ — Салиндерʼ еркармʼ мэтахаʼ пухуцяхаʼ, вэсакохоʼ — Сергей няби Оксана. Нисями Николай Имгович ӈаниʼ тюкона мэ, мелˮ ненэциеˮ поӈгана лэхэт сертавы ӈудаʼ теркоци мирдапиˮ. Таремʼ ӈавар пиремба нюртей мэваʼ тонинзь. Тырабтавыˮ нянькоци сертанинзь. Тёнякоʼ няньӈэ вадеˮяниʼ. Нюдя ӈэваниʼ мальӈгана нисямиʼ ханярид тованда пуд талбэйˮ, ханюйˮ няньʼ ютекэци тэврабата, таремʼ лаханасеты: «Няньдамдиʼ тёняко ӈэдабтась».
Хабиˮ вадавна хардандоʼ нюмʼ — Князьпохол. Тикымʼ тяхасовна ӈармэрка ненэцьʼ Тайшин Ефим Александрович вадеˮӈадась. Пыда иланда ямбанʼ халямʼ хадабадаӈэ таравы: «Тедаʼ ханяӈэхэна ӈаниʼ поӈгарцетыдмʼ. Халяваˮ ӈормаʼ пирувна таня. Тевʼ ёльцяӈгана яхананаˮ палкурˮ паӈо». Хэвхананда ӈарка хасава нюнда нюˮ мэвыць. Иримдоʼ нядаба варемдоʼ мэˮӈаць. Пиревы халяндоʼ евэйхана мядонди ӈавламбиць.
Сиддоʼ тасламбадаˮ сямянхат ӈавыдота ӈавар пирембадаӈэ «Най-ныӈ» мядʼ тер нюмдевыˮ. «Маняˮ ӈахакуд хамекуваць. Пиреӈгованаˮ серʼ хуркариˮ ӈаварˮ сертаваць. Халяʼ евэй, вэя лескаˮ, хабартаʼ мыдхад, тыˮ ӈэвэйхат сертавыˮ няньˮ, ӈодяˮ», — Алла Тайшина маймба лаханась. Тюˮукуна вадеˮмыˮ ниниˮ ӈобтикы ӈудаʼ терсиˮ ниць хаюˮ, сиддоʼ ӈаниʼ ненадумдаць.
Мелˮмана сэдоранаˮ неˮ сэдъидоʼ яӈга ӈадимдембидонзь. Тарця сава яляʼ нямна тамна паднаӈгуваˮ.
Галина Окотэттоʼ падвы
Сидяӈгˮ: Галина Окотэттоʼ тадтавыˮ
Авторы
Няръяна Нгэрм
Темы