обновлено: 07:36, 10 ноября 2023
Няръяна Ӈэрм
Колизеймʼ ялэхэˮ маниевы
Тандаяʼ ӈопой няваˮ Москваʼ няд тось. Ехэрана Италияʼ нямна ӈэдалёрмысь. Ӈамгэʼ пиртʼ Римхана мэсь. Тодоˮ яхат ӈэдаˮ илебей ненэциеˮ форуманʼ ханˮӈась. Сиддоʼ хуркари ӈаварˮ тэнз, ӈаварˮ нямна ӈэда тасла тарана серо вадеˮманзь маˮлавыць.
Россияхад ядэрмы мале сян ӈэвы. Тикыˮ нита пондʼ Яʼ малхана илена Нечей Сэротэтто еремы. Маˮнисяв, ӈани яхана ӈулиˮ ядемби, тэри сава, тамна нянзико ембдярота ядэрмыˮ. Мэкаданюˮ, маняˮ яхананаˮ сыра хаˮмыˮ, еряˮ лимбяка ӈамгэринаˮ сераваˮ. Таняна тецьдахад ехэраˮ.
— Нечей, ӈэрмʼ терˮ ӈокаˮ ӈэсаˮ?
— Ненэця ӈулиˮ ӈокаць, Африкаʼ, Канада, Северной няби Южной Америкаʼ терˮ ӈэдакыˮ. Ӈокханда сидя юрˮ пирваць. Маняˮ яхаданаˮ туӈгосˮ, вепсˮ, ӈаноханˮ таняць. Ӈаварˮ нямна лаханаваць. Хусувэваˮ харта ӈаврата тэнз вадеˮӈась. Таддикахад хурка тасла яˮамна серотоʼ ӈадибермамʼ хэтыбиць. Тедаʼ невхэнда тотревʼ ни тецюˮ, янамбовна етриʼ ядемдана, ядемданава ӈавар вомдабида, нида, тикымʼ тасламбиваць. Мань ӈамза ӈаябадʼ нямна лаханадамзь. Маˮнисядам, ненэй ненэцяˮ ӈавхы похот тыдоʼ вадабиˮ, халямʼ хадабиˮ, ханеˮ. Ӈадьбята ненэйри ӈавар ӈорӈаˮ. Халяˮ, ӈамзаˮ, ӈодяˮ — харвабтанинаˮ тиˮ. Янʼ моёпадаваˮ яӈгу. Невхэхэд иринанаˮ таремʼ илевыˮ, тедалахана пыдоʼ иламдоʼ нёдаваˮ.
— Ханзерˮ Италиянʼ тэвын?
— Ехэрана янʼ тэвава нянани харада яӈгосеты. Ӈамгэри яʼ вэт тэва пирˮӈав. Тиртя ӈаноˮ нулаӈгалвахад Внуково нюбетахад Стамбуланʼ тиявˮ. Пуна Риманʼ тэвывˮ. Таняна сиднаˮ мале ӈатевыць. Ӈопойˮ, таʼ ӈахакуд падармʼ ӈэдара, визамʼ серта сероˮӈа. Луцаʼ есямʼ евроӈэ тада тараць. Таддикахад ӈани яʼ вадамʼ теневава сава. Мань ханяӈэхэˮна английской вадамʼ мэˮӈадамзь. Ӈаноханˮ танявыць, нянандоʼ пыдоʼ вадавнандоʼ лаханадамзь. Хацяˮ ехэрана вади тензибтедмʼ. Сензелава хардаваˮ Колизейʼ хэвхана ӈась. Хусувэй яляʼ сюдбяко сюртяв мядʼ хэвувна ханцетыдмʼ. Невхыˮ похоˮна мюнанда хуркариˮ пирдырмаˮ ӈэвыˮ. Ӈулиˮ ненадо я. Хубтыхы ӈормахана круассанмʼ, кофемʼ ӈорӈаˮ.
— Тамна ӈамгэмʼ вадецадаˮ, ӈамгэ мэкадмʼ манэˮӈан?
— Ханяӈыˮ невхы похот ӈормы ӈаврадоʼ ӈадимдеванʼ, лэтраванʼ харваць. Хусувэй яляʼ несэй, тодоˮ тэнзˮ ненэциеˮ ӈавар хорпиваць. Нюртей яляхана ты пэртиˮ ӈавар манэˮлабтамбиць: мараӈгаˮ, ӈамзаˮ, халяˮ. Пуна Канадаʼ, Африкаʼ терˮ, тамна ӈаниˮ ӈавратоʼ нямна лаханаць. Канадахад ӈэдаˮ ӈаварˮ ӈавуˮмыць. Бизонʼ ӈамзамʼ ӈорӈаваць. Ханяӈыˮ илебей ненэцяˮ ресторанхаˮна ӈаврадоʼ мирдапванʼ харваць. Маняˮ ӈани яʼ тер тыʼ ӈамзахана ӈавлэйнаць. Тырабтавы, сямдравы ӈамзи ханабидамзь. Ханзерˮ сусавамдоʼ нивась хамэдаˮ.
— Ӈаниʼ сяхаʼ маˮлюрмандаˮ?
— Сидя поʼ хэˮмяхад ӈаниʼ маˮлёдаˮ. Ненэцьʼ падрода харта ӈэдара пиръяда. Ӈодьˮ падроʼ сяхаʼ маˮламба пявамʼ теневая. Таремʼ ӈэдалёрма ёльце сава. Мякани тэвˮмахадани вадеˮмандами ӈока ӈэсеты. Несэйдаревʼ ханˮӈадмʼ.
Ханяхарт сабеʼ ниня ӈэдалёртаӈэ нянани лахарёхонда инзелевари тоˮолхась. Италиямʼ хареˮ сэвхаˮнани манэˮман харвобцоми тось. Масиˮ, сяхариʼ таремʼ еремда. Яʼ маланʼ торовамʼ ӈэдараӈгудамзь…
Анна Яптикʼ падвы
Сидяӈг: Н.Сэротэттоʼ тавы
