Няръяна Ӈэрм
«Лабтэйко» ӈэдалёрта
Сеяхаʼ школахана «Лабтэйко» нюбета театр таня. Юнда мале няхарˮ поʼ ямбанʼ Ямалʼ тиӈгэвна ханяриʼ тэворӈа. Интернатхана иленаˮ выʼ терˮ ӈацекыˮ тохолковандоʼ пуд таняʼ ядэрӈаˮ, лаханако мэць тоходанаˮ, ненэй илеˮмядревʼ сертабидоʼ. Поӈганандоʼ сямянхат сававна лахананаˮ не ӈацекыˮ, хасава ӈацекыˮ мэˮ. Лаханакодоʼ тидˮ манэлабтамбидоʼ.
Сидтоʼ тидхалембада — Клавдия Юрьевна Салиндер. Ӈарка нямдоʼ няць мале ӈока лаханакомʼ ӈадимдевыˮ. Тарця серканандоʼ тохолкодаˮ ӈацекыˮ ёльце варемдоʼ мэˮӈаˮ. Хибяхавадоʼ тёнякоӈэ тарасеты. Ӈаниʼ хибяхав пинхад тэваси, писяко, вэнеко ӈэӈгу. Лаханакондоʼ серʼ ембадёбтоʼ, тамна нир хамедаӈгуˮ, пухуцякоӈэ, вэсакоцяӈэ ханяӈэдоʼ таранакы?
Манэˮлабтамбавыˮ лаханакудоʼ тарцяˮ: «Теняко няби тэваси», «Харадʼ хоркэця», «Вэнеко нядамда пю», «Писяко», тамна ӈаниˮ.
Тедаʼ нядандоʼ ӈаниʼ едэй юн тось. Ӈэрёй ныланавандоʼ мальӈгана Салемалʼ ёльцяндʼ ӈэдалаӈгудˮ. Таняна тохолкода няхатоʼ лаханако вадетаˮ. Сиддоʼ нянандоʼ манзаранидоʼ нядабаӈгуˮ. Ӈацекыˮ нитоʼ сякана пыхыдадоʼ манэˮлабтаӈгуˮ, вадавнандоʼ лаханаӈгуˮ, теневабцодоʼ тамна ӈокамдаӈгуˮ. Едэй сава нядамдоʼ торомдаӈгуˮ.
«Лабтэйко театрмʼ минренаˮ тарця серкаˮна мале торомбэйˮ. Масиˮ Салемалхана иленаˮ ӈацекэцяˮ нитоʼ тотревʼ ӈобтикы таремʼ лаханако мэць таслаӈгудоʼ. Тикыʼ еˮэмня харвабцори тара нивˮ, ӈарка нитоʼ нядˮмасипойˮ ӈаниʼ вуниˮ хаёдˮ.
Г. Кинчинаʼ падвы
Авторы
Няръяна Нгэрм
Темы