Няръяна Ӈэрм
Лаханако манэ’’лабтамбаӈгу’’
Ханярина хардаха’’на ӈэрм’ тер’’ нина’’ ненэй вадава’’ ханзели’’ нерня’ минредо’. Тикы’ сер’ вадёдана’’ ӈацекына’’ вадамдо’ теневаӈгудо’.
Тазовской районхана Халмер-Седехэна интернатхана илена’’ ӈацекы’’ лаханако ӈадимдембаӈгу’’. Ӈарка табекода нядандо’ Алиса Дмитриевна Неркахы тара. Ӈобкана сертабавандадо’ — «Лэмороко» нюбета театр.
Небо’ «Российский Север» форумхана Алиса Дмитриевна грант’ еся ня’’амвысь. Нядаӈгосэй’’ есяха’’ната таславы театрамда тидхалембаӈгуда. Теда’ тараванда ӈамгэридамда тэмдавы. Тад пуна тамна ӈани’’ серода таслахая, ӈацекыта ня хамекода’’. Хуркари лаханако ты’’ саполана ирыхына манэ’’лабтамба пяӈгудо’. Манзаянда тид’’ мимб’’, ӈани’’ нюдяко’’ хардаха’’на ӈацекэхэ’’на манзарана’’ няхата вадетада.
Ненэй вадавна ӈэда’’ лаханако выӈгана илена’’ ӈацекы’’ нензел’’мана вадетыдо’. Вадамдо’ ехэранарка’’ ӈоб’ тарем’ тохолкода’’. Лаханакохонато’ ӈэрм’ тер’’ ила’ саирм’ манэ’’лабтамбаӈгу’’.
Пэдава нява’’ ӈацекы’’ е’’эмня ёльце сава тарана серм’ сертаби. Тамна тяхасовна варемда мэ’’ӈая. Ӈэрм’ тер’’ илебей’’ ненэця’’, ӈацекы’’ иринато’ ила’ саирм’ тидхалё минремдо’.
Автор: Солне Ӈокдэта’ падвы
Авторы
Няръяна Нгэрм
Темы