обновлено: 08:29, 16 октября 2024
Няръяна Ӈэрм
Лаханаком’ ненэй вадан’ тэвравэдо’
Саляӈгардаханана’’ хор’’ иры’ самлянзимдей яляхана толаӈгова’ хардахана «Иван ири’ падвы» лаханако’’ книгам’ манэ’’лабтаць. Иван Григорьевич Истомин’ падвы лаханаком’ ненэй вадан’ тэвравэдо’.
Тикым’ манэ’’манзь, инзелеванзь, ненэця’’ ӈобт’ ма’’лыць. Книгам’ ӈадимдевы’’ нина’’ ханзер’’ тарця серм’ тасла’’мамдо’ ваде’’ӈаць. Пыдо’ тетӈэ сертабавэдо’. Паской падта’’ма Дарья Вануйти няби Зоя Худи падтавыди’. Ненэй вадан’ Светлана Тусиды тэвравыда. Инзеленаӈэ няна’’ хусувэдо’ ханзер’’ тара’’мамда хэтась. Зоя Худи тарем’ лаханась:
— Ӈацекы’’ е’’эмня падвы книги ёльце харвобтасетын’. Ханяӈэхэна хар’’ни толабасетын’. Хуркари паской’ падта’’мидо’ манэ’’сарцетыдм’. Иван Григорьевич’ лаханако толабинась, теневын’. Тарця манзаям’ тавадо’ ихиняни савась. Хар’’ни таславась — хурка падта’’ми серта сава. Ӈацекы’’ книгам’ манэ’’сарпато’, нянандо’ илека ӈэӈгу.
Светлана Тусида ненэй вадан’ падна’’мида ваде’’ӈась:
— Тикы манзаям’ сидя сян иры’ падыбивась. Тюку по’ нара’ пяваць. Тарця проект сертабаб’’, нянд лакри’ манда’’: «Ӈули’’ мер’, ненэй вадавна пада тара!» Ӈоб’’ иры’ сер’ тидхалевась, книга’ мю’ пакледонзь. Падвэни хурка ӈэвам’ манэ’’манзь, тад пуна тадонзь, салмравандидо’ танявы’’, тикыдо’ тидхале’’мяхадани’ ӈани’ няндо’ ми’’ӈавась. Ненэй вадавна паднаб’’, грамматика тара нив’’. Словарь’ сер’ паднадамзь, теневана’’ нини хонрамбидамзь. Нюдяко ӈацекы’’ е’’эмня паднаб’’, ӈани’ тара.
Нядандо’ мядонзэйӈэ лаханако’’ книгам’ ня’’маваць. Мале ӈока ненэць’’, ӈацекы’’ паской падарм’ ханаць. Помнандо’ ядэрмани мальӈгана Екатерина Салиндерм’, ненэй сё мэтам’ ядабтадамзь. Пыда ӈобтарем’ инзелеванзь товы. Нями книга’ проект’ нямна хонрамбивась. Тарем’ мась:
— Мань ихиняни сава, вадава’’ тохоламба няд’’маӈэ мэтава’’. Ӈацекы’’ ненэй вадавна толаӈгода’’ма’’. Тамна ӈани паднани’’ падвы ненэй вадавнана падбато’ сава ӈэӈгу. Теда’ мань книгам’ ня’’мадамзь. Ӈули’’ илика, паской падар’’. Ненэй вадавна толаӈго’’мами хубтарка. Мякни тэв’’махадани’ Истомин‒ирини лаханако ненэй вадавна толаӈгун’.
Тад пуна илебей ненэця’’ толь’ тяхана ӈамдё ириндо’ иле’’мян’ инзелець.
Дарья Вануйте — падаӈго ва’’лёй ненэй не мядонди падтаӈго тохоламбись. Пыдо’ мараӈгам’ падаркана сертабиць. Хурка’ то’’олха ӈолепяха’’на падтаӈговам’ ӈадимдембись. Книгам’ сертабаванда нямна хонрамбивась, Дарья тарем’ ваде’’ӈадась:
— Мань сейми лумбарась. Тарця тарана манзаям’ пэрманзь си’’ми хонравадо’ ёльце савась. Лаханаком’ нерде’ толавась, ӈамгэ’ нямна ӈэвамда тасладамзь. Иван Истомин’ падвы лаханако не нюхуни толабасетын’. Тедахав тамна паской книгам’ сертава’’. Библиотекахад толаванзь ӈацекэхэ’’ мипаӈгудо’.
Солне Ӈокдэтта’ падвы
