Няръяна Ӈэрм
Лекар’’ вымна тирӈа’’
Тюку илаӈгана лекар’’ вымна мюсерта’’ ненэцие хабцясявандо’ нямна ирелейдо’. Теда’ ты пэрти сянакова’ яляха’’на лекар’’ мяк’’ хайдо’. Тарабата пыдо’ мюсертаха’’ харто’ тэворӈа’’. Хэвы си’’ив яляхана Тасу’ явхана тиртя ӈано хой’ нямна тилыць. Лекарадо’ тэхэ’’на мэна’’, нядэна’’ ненэцяӈг’’ мядото’ хэван’ нумгад нултаӈга’’. Ӈоб’’ лекараӈэ ядэртадо’ Яр Лидия Павловна. Пыда манзаянда нямна тарем’ лаханась:
— Сидя си’’ив яля’ Хальмер’’ Седе’’э’ вымна ядэртава’’. Ӈодь нумда сава ӈэхэваб’’ хубтахана хардахад тиӈгава’’. Самляӈг яля’ сер’ манэ’’мы мя’’ма’’ ӈока. Маня’’ мале сянва’’. Нердена яляхана ӈули’’ тетись, ӈадьбята ӈоб’’ лекар’’ мутрава’’ манзара я’’мадась. Тарцям’ няд’’мяць ненэця’ сёнзя’ мюйм’ ӈарханда манэць пирӈава’’. Сеймда, вэяхананда сакарта хурка ӈэвам’, тамна ӈани’’ ӈавэта хурка ӈэвам’ таслаӈгува’’. Тандая’ тавы мутрадо’ ӈарка тецьдахана манзара нивэда пирас’’. Мань вэям’ ханладм’, лекараха’’на тикар’’ ёльце тарана ӈамгэӈэ таславы. Вэя хурка ӈэва хуркари хабцяӈот танявам’ манэ’’лабтаӈгу. Тикы’ хавна поса’ хабцяӈгад яӈганава’’, ӈацекы манэ’’сарӈава’’. Ӈамгэ’ то’’олха хабця таня’’ӈа’’, мал’’ хонрамбина’’. Нябимдей яляхана таминда манзаява’’ торамдамбива’’, хусувэй ӈамгэм’ минхана’’ сертабива’’. Тикына’’ помна маня’’ ненэй ненэцяӈэ лахарёна’’ мэць сохова’’ танясеты.
Теда’ мале сян яля тиро’’махадани’ тарем’ таслав. Хойхана илена’’ ненэця’’ вэито’ паӈг минхандо’ хомбин’, ӈули’’ сававна ӈади’’. Пили’’ манзара тарця ӈэрха, хардахана илена’’ ненэцие’’ вэям’ ханлаб’’, пон’ вэито’ паӈг пюсетына’’. Мяк’’ нултаӈгабана’’, хой’ тер’’ турта’’ лекар’’ поӈгана ненэй ненэця’ нямдо’ манэ’’пато’ маймби’’. Пуня’ ни’’ ӈа’’. Мань нянандо’ ненэй вадавна лаханкурӈадм’. Ӈамгэ хабцяӈото’ таняб’’, тидпой’ ваде’’ядо’. Ӈоб’’ не ӈэвамда едевамда ваде’’ӈась. Ма’’нисяв, лекаран’ хан’’ӈадамзь, пардондами таць. Тад манэ’’янэ, ханзер’’ лекар’’ пардонда тасядо’, таминдо’ тарем’ сяры’’. Вадавнанда хаӈгурманда мальӈгана ӈоб’’, сидя таблеткам’ ӈамыкы, едяда хая, таминда ӈэвадэй’’. Пыда едянда янамбовна ланово’’махад таминда пардонда ӈаворць ӈэвадалавыда. Тэхэна мэна’’ тарця’’ ӈэсяты’’. Лекараха’’на едянд хэ’’мяхад тарем’ ӈод’’ ӈамгэ’ пират пардонад ӈаворпат тара’’.
Ӈока хибя’’ хардан’ ӈэдалёрмы’’, ханяӈы’’ ӈэсыхы’’на вэсако’’, пухуця’’ ӈоб’’лиӈэ хаюрмы’’. Тикы манзаина’’ помна хой’ тер’’ нина’’ ӈули’’ нямбара’’. Мэкада’’ма’’. Ӈобто’ ма’’нив, хардан’ 2011 похона тэвормы. Ма’’нисяв, таня’ ядэрць тарабцода яӈгу, лекарахаван’ тамна пон’ ихиня тэвормадавэй ӈэӈгу. Ханяӈы’’ тидпой’ укол ӈабтаван’ ни’’ харвасету’’. Та’ ёльцяӈгана падарм’ пада тарасеты. Ханяӈы’’ хамедамбидо’, укол ӈабта, вэям’ ханла серо’’ӈа. Пуня’ ни’’ ӈа’’. Теда’ поса’ хабцяӈгад яӈгабина’’, маня’’ хусувэй по’ вэяндо’ хурка ӈэвам’ манэ’’сарпана’’ тара. Тарем’ ни еребер’’.
Пуна’ тамна Паюте’’э’ вымна Ӈэдя’ няю’ тиртава’’. Танямна мюсерта’’ ненэцие манэ’’сартава’’. Ты пэрти’’ сянакова’ яляхана хусувэдо’ хардан’ ни ха’’мор’’, ӈадьбята тиртя ӈанохона тир’’пана’’ няндо’ ӈули’’ ӈарка таром’ минрева’’. Тарабата, хойхад хардан’ лекар’’ мят’ ханлэйна’’.
Автор: Марина Яр’ падвы
Авторы
Няръяна Нгэрм
Темы