Маянд’ ерембана’’ – сидна’’ нядаӈгу’’

Хор’’ иры’ тетимдей яля’ яна’’ тиӈгывна ненадо ялява’’. Сидна’’ хуркари’’ тэнз’’ маяӈгат, илаӈганана’’ тосакабтёда серкат лэтамбада’’ нина’’ яля. Луца вадавна — «День гражданской обороны». Ненэй ненэциена’’ поӈгана тарця манзаям’ минренава’’ ӈани’ ӈока. Е’’эмняндо’ таславы яляндо’ ед’ няндо’ сямянхат сава вади мэ’’ӈава’’.

«Ямалспас»‘ тер’’ минрена манзаядо’ саць тоенарка. Пыдо’ ӈамгэри вэва нумгана лэты’’, ӈодь’’ маянд’ еремда ненэця’ нямна намдабато’, таминдо’ паромба санаӈга’’. Ханяӈэхэ’’на тэвадана’’ ёдо’ сехэрэсяда явна ханаць пэрӈа’’. Ӈанихи’’на я’ понд’ еремы, хардан’, тамна ханяри буранахана ӈэдалёди, хадхана, сисьда пэдара’ поӈгана ёхоборти тецьда’, синё’ помна пюрцетыдо’, нядабасетыдо’. Неновна пилютархадо’ ӈоб’’ яӈгосеты. Саць ӈаха’’ хэсь тарабта тиртя ӈанодо’, мерета мотор ӈанодо’ ӈани’ хамэдёсеты’’. Я’ нимня, нум’ нямна, и’’мна тосеты’’. Вынд’, ты пэртяха’’, нядэнаха’’ тэворцеты’’. Ненэця’’ сяхаринда няндо’ спутниковой телефонувна лаханасеты’’.

Яля’ ямбан’ манзаямдо’ ваде’’мы’’

Сидна’’ маяӈгат ӈэдабада’’ «Ямалспас» тер’’, парананам’ хабтабада’’, лекар’’ тандаярка манзаяндо’ нямна лаханаць. Газетава’’ серта’’ма яля’ пэвсюма’ няна «Геолог» нюбета харад’ хэвувна ядэсумбиваць. Ненэця’’ ёльце хамекуць. Теда’ мэсь хуняӈы хэбидя яляхандо’ ӈамгэридо’ хамэдамбавыдонзь. Хуняна яля’ еркы ӈоро’’ма’ пуд манзара нята няни ня’ яӈор’’ тикавна ядэрӈанинзь. Манэ’’лабтаӈэ хуркари ӈамгэри тавыць. Ненэця’’ сюдбяко машина’’ мю’, палатка’’ мю’ тюӈгаць, ханяримна, таняримна хонаркуць.

— Тюку машина мутрата, вынд’ тэвхартаб’’, мунона’’ ханяри’ тэворӈа’’, связьва’’, интернетва’’ сяхаринда таняӈаха’. Харвабта ӈопой ненэць’ Саляӈгардахана манзарая, няби хэвняна ӈаха’’на мэя, муноди’ ӈобт’ тэваӈгуд’’. Тамна ӈанива’’ ненэй илесь’ мя’’лаха, манзаранина’’ ныланава’ е’’эмня таславы. Тикы’ хавна ӈарка ервадана’’ тарана няна’’ яӈга машинада таня, — ӈопой луца тарем’ лаханась.

Палатка’’ мюня манэ’’манда ӈани’ ӈокась: «Санитарно-обмывочный пункт», «Пост радиационного и химического наблюдения», «Пункт первой медицинской помощи». Нюртейм’ не ваде’’ӈадась:

— Ӈамгэри тикы радиациясавэй яхана манзара’’мандо’ пуд ненэця’’ мэ’’мы’’ имбытадодо’ мал’ екабидо’, пуна мата’’. Матлава’ ядо’ мале сян лохосавэй. Мат’’махадандо’ няндо’ едэй ембдяро мипи’’. Вэвако ӈамгэри палабтавы’’ паныдо’ халтахая ӈобтикы нянандо’ ханабидо’. Яӈга падарт’ пыхыдадо’ падыбидо’, пуна тарем’ падкудо’ хомбидо’. Таминда тюкон’ нерня’ тюӈга серо’’ӈа, пуна мале лекараха’’ ненэць’ ханда.

Тамна’ тяхакуна ӈэда мяд’ мюня лекар’’ мэвыць. Хой’ няна хаӈгулана таняб’’, сямян ӈамгэмдо’ ханахая, лакри’ тиртя ӈанохона вынд’ тись пир’’ӈадо’.

Сидяӈг’’: А. Яптик’ тадтавы’’

Ты’’ лекар’’ манзая’ нямна ӈани’ намдаваць. «Противогаз» серыба хорпиваць, серыбаб’’ нензел’’ ӈэвыць. Маркана илена ненэця’’ теневабцодо’ ӈокамдэйдо’. Теда’ няд’’ма таралпата хибя сиддо’ нядаванзь товахад теневаӈгу’’.

Анна Яптик’ падвы

Авторы

Няръяна Нгэрм

08:08, 19 октября 2024

Темы