Няръяна Ӈэрм
Маня’’ илма’’
Хэвы си’’ив яляхана ӈэрм’ терӈэ нямнана’’ сидя сава юнм’ намдаваць. Округханана’’ тадри’ илма’’ сибёмдембада несэймдавы концепциям’ пандамба пяӈгу’’. Тикым’ Ямална’’ ӈэвахы ерв Дмитрий Артюхов’ ватовна минредо’. Тарця вадам’ депутатна’’ ӈэвахана мэна Сергей Ямкин мэ’’ӈадась.
Едэй падарто’ ила’ саирм’ лэтрава’, нядаӈгова’, тамна ӈани’’ ӈавэ’’ нямна ӈэӈгу. Яӈгамда’’махадандо’ едэй няд’’махана панда’’махадандо’ концепциява’’ ханяцей’ мэберта. Тарця’’ иӈудо’ ӈэрм’ тер’’ серо тидхалембада’’ ервона’’ мюсерта’’, нядэна’’ ненэцие’’ помна ӈэдалёро’’махадандо’ ховыдо’. Ерв’’ ӈобт’ тэв’’махадандо’ ӈарка’’я тарана няд’’ма’ падарӈэ серта тасламбидо’.
Ӈэрм’ тер’’ серо тидхалембада департаментхана манзарана’’ хэвы похона ханзер’’ ӈэрм’ тер’’ е’’эмня таславы’’ еся сад’’мамдо’ ваде’’ӈаць. Небо’ 5,5 ёнар’’ мюсерта’’ мяд’ тер’’ илаӈганандо’ тарана’’ ӈавэ, еся’’ няд’’ми ня’’мармы’’. Няндо’ 3,3 ёнар’’ мяд’ ӈум’, самляӈг юр’’ корм’, керосин’ лампам’, поӈга’’ иням’, ӈани’ тамбир’’ генераторм’, ёнар’’ пир’’ бензинхад мэта ихибцям’ ми’’мыць.
Тохолкода’’ илебей’’ ненэциена’’ ӈани’ сававна нядаба пяйдо’. Е’’эмнандо’ хуркари’’ еся’’ няд’’ми ӈадимдемби’’. Сидя юкад вата ӈоб’’ ӈацекы’’ сиднтет ю’’ ёнар’’ есям’ ня’’маць. Поӈганандо’ мюсерта’’ ненэця’’ ню’’ ӈокамбойдо’. Тарем’ ӈарка яхана университетха’’на тохолкоди нядаби’’. Тарця няд’’ма’ есядамдо’ небой по’ лимбя’ ирыхына ӈадимдець. Техэ яхандо’ тэввандо’, тохолко мэ’’манда ӈамгэдамдо’ тэмдавандо’ няю’ мипидо’.
Лекар’’ манзая’’, тохолкова’ нямна вадидо’ ӈобтикы таняць. Харе’’ вадина’’ мэ’’мам’, нерня’ минревам’ ӈани’ тензебтедонзь. Тикы няю’ ӈока сава’’ серо тидхалемби’’.
Тарця няд’’мидо’ маня’’ ӈэрм’ терӈэ харе’’ илна’’ саирм’ лэтравана’’, минревана’’ няю’ ӈадимдембидо’.
Автор: Марина Яр’ падвы
Авторы
Няръяна Нгэрм
Темы