Няръяна Ӈэрм
Манзаямда ненадумдавэдоʼ
Россия янаˮ тиӈгывна хартоʼ тэнзатоʼ вадахаˮ ӈацекы тохоламбадаˮ Ӈарка съездханандоʼ маˮлюрӈаць. Таняд ёльце сава юнмʼ намдаваць. Маняˮ янаˮ тер Людмила Алексеевна Вуквутагина тамна сидндет нита серʼ ӈарка ненадумдаˮмасавэй падармʼ няˮамвы. Сиддоʼ янаˮ ӈардавна невхы иринатоʼ вади нерняʼ тидхалембавандоʼ еˮэмня савуˮмыˮ.
Ненадо падродоʼ Сергей Сергеевич Кравцовʼ Россияʼ тохолковаʼ серо няˮамбада министрʼ пидтеˮмяхана мэйравыˮ. Людмила Алексеевна школахана мале тет юкад вата нюртей поˮ ямбанʼ манзара. Нюдя ӈацекы тохоламбаванда хавна ненэй вадаʼ урок минре. Ӈарка ненадумдаˮмамда тохолкось мэтаˮ ӈавори сертабаванда еˮэмня няˮамвэдаˮ. Неноховавна тикыˮ — «Ненэцяʼ вада» нюбетаˮ учебникˮ. Тамна — ненэй вадаʼ урокахаˮна нядˮмаӈэ мэтаˮ тетрадьˮ. «Просвещение» издательствоʼ няна ялянʼ ӈадимыˮ. Ӈобʼ серʼ «Новый учебник Севера» серияʼ пеляӈэ тараˮ.
Ямалʼ, Таймырʼ, Ненэциеˮ округхана ненэй ӈацекынаˮ малʼ пыда сита нядˮмяць падвы учебник мэць тохолкуртаˮ.
Тамбирувна ненадо манзаямда нянаˮ вадеˮӈадась:
— Сибимдей классхана мэта ненэцяʼ вадаʼ тохолкобцьʼ 2018 похона мале ӈадимясь. Тедахавʼ 8-й, 9-й классʼ еˮэмня падвыниˮ таняˮма. Малʼ тетрадьсавэйˮ. 6-й, 7-й классʼ ненэциеˮ литературамʼ ӈаниʼ сертаваць. 2-й, 3-й, 4-й классˮ еˮэмня ненэй вадавна падвыˮ толаӈгобцьдоʼ ӈобтикы таняˮ. Ӈацекы тохоламбади нядˮмаӈэ мэˮмандаˮ табекосавэйˮ падынаць.
Иланда, мята терˮ нямна таремʼ лаханась:
— Мань Белояркана соядамзь, мамав еркаравнанда Ламдой, Приуральской районхы Седельниковоʼ яʼ тер, нисяв — Бармич, Канинʼ саляʼ тер. Нисями Салянгардахана ЗВТхэна тохолковысь, таддикахад Белоярсканʼ манзара товы. Таремʼ нидиʼ ховыдиʼ.
Нерняӈы илаӈганани тараванда манзаями Ленинʼ маркана, Ӈэрмʼ терˮ факультетхана тохоламбивась. 1984 похона таняна тохолковами малевась, харˮни яхани манзараванзь тодамзь.
Сидя не нюми, ӈобкана ӈацекы тохоламбадахаʼ. Елена Юрьевна луца вадаʼ урок минре, школанаˮ завучӈэ тара. Ӈобтикы А.И. Герценʼ нюмамʼ мэта Университетхана тохолкусь. Нюдяюмʼ — Маргарита, Петербургхана Лесгафтʼ нюмамʼ мэта Университетмʼ ёльцесь. Адаптивной физкультурамʼ тохоламбись. Няхарӈэ Белоярской школахананаˮ манзараваˮ. Хасава нюми электрикʼ, сварщикʼ, сантехникʼ манзаи пэрӈа.
Мале сян учебникмʼ Елена не нюни няʼ падыбининзь. Юнета учёной няваˮ Мария Яковлевна Бармич сидниʼ сававна учебник падыба табедамбись.
Тедаʼ тохоламбадиниˮ — 4 «а», 6 «б», 8 «а», 8 «б» классхаˮна мэнаˮ. Вындер ӈацекыниˮ вадамдоʼ малʼ теневадоʼ. 8 «а» классʼ терˮ пелядоʼ луцаркаˮ, хабиркаˮ. Пыдоʼ сабе сававна ниˮ лаханˮ. Тикыʼ хавна поӈганандоʼ тетдоʼ — ӈысмаˮ. Мань вадамдоʼ теневав, ӈадьбяни ӈаниʼ тохоламбин. Малʼ ӈобкана ӈопой лохоʼ мюня мэсетыˮ. Таремʼ ханяӈыˮ тамна нитоʼ вади тохоламба пирӈаˮ. Луца вадавна тидхалембасетын. Ӈопойрида вэва: ӈысмиˮ вадавна 5-й классʼ пуд учебникваˮ яӈгу. Тикахад ӈаниʼ Тохолковаʼ серо тидхалембада департаментхад ненэй вадаʼ учебникдаваˮ, тетрадьдаваˮ тянёвна ӈэдабтамбиˮ. Ӈадьбянаˮ невхы толаӈгобць мэцетываˮ.
Ти, тарця тарана манзаямʼ ӈацекынаˮ еˮэмня Людмила Алексеевна минре. Сита нядˮмяць ненэй ненэциеˮ поӈгана хартоʼ вадидоʼ теневанаˮ етриʼ ӈокамданаӈгуˮ.
Автор: Галина Окотэттоʼ падвы
Сидяӈг: dkmns.yanao.ru няд ханавы
Авторы
Няръяна Нгэрм
Темы