Няръяна Ӈэрм
Манзаямда саць теневада
Пэ’’ хоё’’ няна ӈэда Аксарка’ тер Антонида Ивановна Сметанина иланда ямбан’ минрена манзаита е’’эмня ненадумда’’мам’ ня’’амвы. Пыда сёётэй не, тикэнда хавна тарана’’, хынота’’ нида нерня’ тидхалемби. Ӈацекы’’сита няд’’мяць невхы’’ иринато’ сё тохоламби’’. Янда тер’’ юнета нямдо’ ёльце саву’’ӈадо’.
Ня’’амвы ненадумда’’мада «Серебряная гагара» нюбе’’ӈа. Тарцям’ хусувэй ненэць’ недвоць нида пират’’. Антонина Ивановна Ямалханана’’ ӈока по’’ ямбан’ ненэй ненэцие’’ культура’ серо нерня’ тидхалемби. «Ялэмд» няби «Нумгыкоця» ансамбльха’ нермбэртяӈэ тара. Манзаяда илаӈгаданда пере. Лаханако, сё нюдя ӈэванда мальӈгэхэд теневыда. Нисяданда намдормыда. Теда’ тэри харта мята тер’’ пирувна ваде’’манда хавна ӈани’’ янда’’ терха’’ тэволэйда. Ӈарка спектакльӈэ сертабида. Тикы серкананда сёётэй нида, тохолкода ӈацекы ӈобт’ ма’’ламби. Пыдо’ ӈобкана ӈока тэнзм’ мэта’’ ненэцие’’ поӈгана маня’’ илна’’ саирм’ ӈадимдемби’’. Ненэй вадавна ӈэда’’ невхы’’ сё, ярабц, лаханако тодо’’ я’ тер’’ намдоръядо’.
Маня’’ ӈэрм’ терӈэ, юнета няна’’ ё’’эмня ӈули’’ маймбива’’. Сертабада манзаяда етри’ сававна миӈая. Илебей ненэця’’, ӈацекы’’ ӈарка нямдо’ мание ненэй вадамдо’, иринато’ сё, лаханако тохоламбая’’.
Автор: Галина Кинчина’ падвы
Авторы
Няръяна Нгэрм
Темы