Няръяна Ӈэрм
Манзаямдо’ тид’’ минредо’
Нядаӈгарад’ тер’’ ӈацекы’’ едэй похона ненадо мядондидо’ ӈатевы’’. Лимбя’ иры’ нюртей’’ ялэ’’ пиркана мядолабтамбавыдо’, ӈобт’ тэвормы’’. Тикы’’ — «Ямал-нюна’’ я!» ассоциация’ тер’’. Пыдо’ сидто’ майбтамбавы’’.
Вера Павловна Окотэтто тамаляӈгы’’ ялэда тарем’ тензебтембидась:
— Неноховавна по’ ямбан’ хуркари’’ серка’’на ва’’лёйӈэ ӈэвы’’ ӈацекы саву’’ӈаваць. Пыдо’ сававна тохолковы’’, пирдырмаха’’на нерня’ ха’’мормы’’, мел’’ нито’ поӈгана ӈобтикы ва’’мы’’. Ӈудито’ терӈэ ӈамнялада’’ хамбетка’’ пад мипиваць. Пихина ӈарка’’я хады’ хэвхана сянакурӈаць. Хыноӈаць, тараць. Маня’’ сейхад миндя вади е’’эмнандо’ мэ’’ӈаваць. Тарем’ яля’ няю’ ӈэда’’ ӈацекэця’’ сидна’’ етри’ нядабасеты’’. 2024 похона сертавэдо’ ӈока. Хибяхавадо’ — мел’’ сэдорана, ӈанидо’ — сёётэй’’, тарана’’, падтаӈгурта’’. Сёбар’’ поӈганандо’ ӈани’ таня’’.
Ӈармы’’ ненэцие ӈани’ нивыдо’ юрыбю’’. Наре’ няна Вэлло Валентина Маткалеевна нядэна’’ мядо’’мана ӈэдалёрмы. Нядаӈгардахад е’’эмнандо’ мядонзэйдамдо’ ханавы. Таняӈы нида мал’’ теневыда. Я саляхана ненэця’’ ӈыхы’’ похот иле’’. Ханяӈы ненэй мядикуто’ хавна пя хардадо’ таня’’. Тикыдо’ харто’ сертавыдо’. Сырэй нумгана мюняндо’ ёльце иба. Тецьдам’ ни’’ пилюс’’. Харад’ лапкан’ хэсь тараб’’нанда — Наре хахаи. Тарця пя хардакохона ӈарка Вануйто Вэлейко хададо’ иле. Валентина Маткалеевна мяканда ӈани’ тэвормы.
Сяхари’ ӈопой яхана нядэна’’ нина’’ едэй ненэцянд’ пили’’ маймбасеты’’. Теда’ хардахад товы нямдо’ мале ӈахакуд ӈатевэдо’. Няданда харад’ тер’’ ила’ нямна хонарковы’’, едэй юне намдавы’’.
Ӈока нюсавэй’’ ненэцяӈг’’ ӈобтикы мядонзэйдамдо’ хамедавы’’. Ӈацекыто’ е’’эмня падкуто’ мюня сянако’’, падтаӈго мэта’’ ӈаворико’’ танявы’’.
Тарем’ едэй по’ нердена ирыхына сейхана лимбика серм’ Нядэй я’ няна сертавы’’.
Галина Окотэтто’ падвы
Авторы
Няръяна Нгэрм
Темы