Няръяна Ӈэрм
Манзаянда пяныдмʼ теневада
Мале поʼ ямбанʼ Россия янаˮ тиӈгэвна хусувэй школахана яӈга ӈацекэхэˮна манзаранаˮ таняˮ. Луцаʼ вадавна «Советник директора» нюбеˮӈаˮ. Школаʼ ервʼ нядаӈгодаӈэ тараˮ. Тохолковаʼ хавна ӈацекэхэˮна хуркариˮ илаӈгана тарана ӈавэ тасламбиˮ. Сянакултамбидоʼ, сава серкˮ тидхалембидоʼ.
2022 поʼ вэбаʼ ирыʼ нюртей яляхад ӈарка таромʼ минреˮ. «Манзаямдоʼ ёльце тяхасовна сертабидоʼ. Сиддоʼ нядмяць ӈацекыˮ тохолковаʼ хавна тамна едэй юне намдорӈаˮ. Илаӈгана тарана мутры хомбиˮ. Ӈацекыˮ сэвхаˮна Россия янаˮ ныхымʼ ӈарамдамбиˮ», — Россияʼ ӈардавна тохолковаʼ сероˮ ӈэвахана мэна ӈарка ерв Наталья Наумова таремʼ сиддоʼ вадеˮӈась.
Тамна тяхасовна манзаямдоʼ минревандоʼ няюʼ еˮэмнандоʼ носиндалаваʼ ирыʼ 20-21 яляʼ Салехардахана, Надымхана, Новый Уренгойхана, Ноябрьскхана, Губкинскийхана тохолковадоʼ ӈэӈгуˮ. Теневабцудоʼ тамна савумдаӈгудоʼ, ӈокамдаӈгудоʼ. Ненадовна яʼ сярʼ ниймʼ лэтамбаваʼ няюʼ ӈэда серо тохоламбаӈгуˮ.
Ӈани нита поӈгана Салехарданʼ тохолкованзь Сэротэтто Луиза Павловна ӈэдалёрта. Пыда Сюнай-Саляʼ школахана ӈацекы тохоламбаванда хавна советникӈэ тара.
Поʼ ямбанʼ тидхалембавы манзаянда нямна Луиза Павловна таремʼ лахана:
— Ӈацекыниˮ сяхаӈгартʼ пуняʼ нисетыˮ ӈаˮ. Лимбяʼ ирыхына «Движение первых» отделениемʼ сертаваць. Тикыʼ пуд хуркариˮ илека серо пяваць. Пыдоʼ теневаˮ: маняˮ иле яваˮ — ӈарка Россияʼ янаˮ пеля. Нерняӈы илмаˮ харˮнаˮ няднаˮ пере. Ӈокамʼ теневабтоʼ, сяхариʼ тохолавыдоʼ нядˮмаӈэ мэтыдоʼ, илаӈганандоʼ тараванда сертамдоʼ мале тедаʼ тэра пирӈаˮ. Ӈобаӈгуна манзаиˮ тэнзˮ нямна фестивальмʼ мэˮӈаваць. Та мальӈгана сава иӈудмʼ намдаць: «Харˮнаˮ манзаяриваˮ ненэцяӈэ сиднаˮ сертаби. Илнаˮ сехэрымʼ минре». Яӈга лахарё ямʼ сямаʼ нямна мэцетываˮ. Нюдя ӈэбтоʼ ӈодˮ сававна хамедамбидоʼ: яʼ сярʼ ниймʼ лэтрамбабˮ, нерняӈы илмаˮ лэтрамбиваˮ.
Сававна имʼ ӈэдарабˮ, манзаянда нямна ихини Леонид Васильевич Лапцуйʼ вадаˮ хаˮморӈаˮ: «Янаˮ ӈацекыˮ сянаковахана, мядиковахана хартоʼ пыхыдадоʼ пыдоʼ вадабюрӈаˮ. Илаʼ хурка ӈэвамʼ, илаʼ ханзерˮ мимамʼ пыдоʼ тохоламбиˮ, иӈудортаˮ, пыдоʼ вадёдаˮ».
Галина Окотэттоʼ падвы
Сидяӈгˮ: Л.Сэротэттоʼ ӈэдабтавыˮ
Авторы
Няръяна Нгэрм
Темы