Няръяна Ӈэрм
Мелʼ ненэцьʼ
Пилюˮ ирыхына Новой Уренгой маркана ӈобˮ ненадоʼ сермʼ минрець. Таняна тодоˮ яхат товыˮ мелʼ ненэцяˮ маˮлюрӈаць. Пыдоʼ мелʼ ненэциеˮ едʼ сертавы «Легенды Севера» нюбета пирдырмамʼ мэˮӈаць. Таняна тодоˮ яхат товыˮ юˮ ненэцяˮ пирдырӈаць. Россиянаˮ терˮ хавна Сербияхад ӈаниʼ танявыць.
Няхарˮ сян яляʼ серʼ сюдбяко пяхат хуркари мэкад ӈавэ мимбавыць. Ӈока хибяˮ помнандоʼ нидоʼ сававна теневыдоʼ. Поӈганандоʼ ненэй ненэцяˮ нинаˮ ӈаниʼ мэвыць. Тюку поʼ сямянхат мелӈэ Никита Хоролямʼ таславыць, Надым маркад ӈа. Пыда пяхад ненэй ненэцяʼ илеˮмямʼ манэˮлабтась. «Подвиг Кольки» нюбета манзаянда няюʼ Никита юрˮ ёнарˮ есямʼ няˮамвысь.
Тикы Колька хибя ӈэбта? Ханяна илевамда, ӈавэ пэрмамда тасламба маняˮ няваˮ понʼ пюрӈаваць. Николай Салиндер Ямальской районхана Яр-Саляхана манзара, илебей ненэцьʼ. Янаˮ терˮ теневадоʼ, ӈока хибяˮ сава юнувнанда намдорцетыдоʼ. Николай сывʼ ту хабтабадаӈэ манзара пэвыць, тиканда ирмня тамна тохолковаʼ сермʼ минре.
Мале танякуй похона пыда тет нюˮ нисямʼ, яхаʼ икад яркавысь, нянда индадмʼ нэкалˮмысь. Таʼ мальӈгана Николай юкад вата няхарˮ пода ӈэвысь. Таремʼ юнда пилиˮ Ямалнаˮ тиӈгэвна сось. Нянда «За отвагу и самоотверженность» медальмʼ миˮӈаць. Лахарёмиʼ пяваниʼ мальӈгана манзаравамда, нивамда, сенз ӈэвамда хонрадамзь. Маˮнисяв, пирдырмахана ӈэнда тэнакомʼ вэнзерˮ вэнˮмы, тедаʼ тикамда лекаратамби.
Тикы илеˮмямда нядˮмяць Новой Уренгой маркана мелʼ ненэциеˮ пирдырмахана ненэй ненэцяʼ нянаˮ Никита Хороляʼ нювмʼ намдаваць. Николай Салиндер нямда ӈаниʼ нядада.
Ӈани похона ӈобтикы тевʼ ёльцяӈгана Хальмерˮ Седеʼ хардахана тодоˮ яхат товыˮ мелˮ хибяриˮ нидоʼ ядабтаӈгуˮ. Масиˮ ненэй ненэцяʼ нинаˮ нюбе ӈаниʼ намдаӈгунаˮ.
Марина Марюйʼ падвы
Сидяӈг: Марина Ярʼ тадтавы
Авторы
Няръяна Нгэрм
Темы