Мел’’, сёётэй’’ ма’’лёвы’’

Ӈэрм’ яна’’ тер’’ тодо яхана иле’’. Тэнзана’’ хуркари’’. Ханяӈэхэна ӈопой тэнзм’ мэтахарт’’ падаркана яӈганя ё’’ терӈэ тара’’. Тарем’ маня’’ ненэй ненэцяӈэ няхар’’ яхана илева’’. Нина’’ нямна юне падаркад толабина’’. Тасу я’ няна мюсертари’’ Таймыр’ няна илена нидо’ няць хахая иле’’. Ханяӈэхэна ӈопой мяд’ тер’’ сидя округ’ сер’ падаркана пады’’. Ӈарка я’ тер’’ Ямалхад Пэ хоё’’ тяхана мэ’’. Тарем’ ӈод’’ Россия’ тиӈгэвна сяхаринда ӈобт’ тэворцетыва’’.

Тандая’ Санкт-Петербург маркана ӈани’ нидо’ манэ’’мы’’. Мел’’, сёётэй’’ ненэця’’ ӈарка фестивальм’ мэ’’мы’’. «Напевы северного ветра» нюбе’’мы. Мале сидндетимдей мэва’ ма’’лёвы’’. Няхар’’ яля’ ямбан’ тарана’’, хынота’’, мел’’ ненэця’’ манзаидо’ манэ’’лабтамбавы’’.

Таймыр’ няд товы’’ Енся’ выӈгана илена ненэцие’’ ила’ саирм’ ваде’’мы’’. Тикыто’ поӈгана ӈацекы’’ сянакубц ӈадимдембавы’’. Тавыс’’, мандо’’, енся’ хаби’’ ханзер’’ илевам’ сёхонато’, тарабцохонато’ манэ’’лабтамбавы’’.

Ямал’ тер’’ ӈобтикы таня’ ӈэдалёрмы’’. Сидя мел’’ не Ирина Окотэтто няби Елена Рыбина сэдъиди ханлавэхэ’.

Ирина Геннадьевна халэ’’ хобахат паской ӈуда’ теркоци сэдыба нида тохоламбавы. Тикы серкана пыда ӈули’’ пирмэда:

— Сян халя’ хобам’ нянани содадамзь. Ӈопойми — на’’мы, нябими — тамна мэядавдавэй, талбэй. Сэдвы падкоцини’’ ӈани’ таняць. Таняна пыри’ хобахад нёлёкоця халя’ сидяӈгм’ сэдыбиваць.

Елена Рыбина — мел’’ не. Салехардахана тикы’ хавна сёётэй ӈацекэци тидхалемби. Хаби’’ вадавна хыноць тохоламбида. Ӈэдалёромита нямна тарем’ лахана:

— Нянани тэвравы сэдъини’’ — хуркари’’, падко’’, имбыт’’, ӈодякохот паӈгалмы’’ ӈаворико’’. Ненэй ненэцие’’, хаби’’, тасу’’ хаби’’ ила’ нямна ненэцяӈг’’ лахананинзь. Ямал’ тиӈгэвна илена’’ нина’’ ила’ саирм’ манэ’’лабтамбининзь.

Тарем’ Ӈэрм’ тер’’ нидо’ торомдамбавы’’, Мяд’ тер’’ по’ няю’ Мел’’ ненэцие’’ фестивальм’ мэ’’мы’’.

Г. Окотэтто’ падвы

Сидяӈг: И. Окотэтто’ ӈэдабтавы

Авторы

Няръяна Нгэрм

07:25, 16 сентября 2024

Темы