Няръяна Ӈэрм
Мелˮмана сэдоранаˮ
Горнокнязевскхана мелˮмана сэдора ваˮлёйˮ неˮ сэдъидоʼ манэˮлабтамбиць. «Вдохновлённые традициями» нюбета выставкамʼ сертавыць.
Сырманзь товы ненэцьʼ ӈокась, таняна етя мякана маˮлюрӈаваць. Паскойвана сэдвыˮ ӈамгэри манэˮсарӈаваць. Хуркариˮ ной паныˮ, ӈодякоход сертавыˮ ниˮ, пэядадˮ, масерˮ, туцякоˮ, падкоˮ таняць. Тикы выставкахана няхарˮ не Ирина Геннадьевна Окотэттоʼ, Алла Хосевна Вануйтоʼ, Анна Николаевна Лаптандерʼ манзаяˮ ӈэвыць. Няндоʼ сейхад ӈэдаˮ саваˮ вади мэˮӈаць. Ирина Геннадьевна выставкандоʼ нямна таремʼ лаханась:
— Мань манзаиниˮ пыриˮ хобахат сэдвыˮ. Сяхаӈгавʼ таремʼ сэдора сиˮми Марина Григорьевна Лобанова тохоламбись. Таʼ мальӈгана халяʼ хобахад ӈамгэри сэдыбавамʼ манэˮлабтась. Ихиняни нензелˮ тоˮолхась. Тикыʼ пуд харˮн сэдора пэйваць. Няхарˮ поʼ ямбанʼ таремʼ сэдорадмʼ. Мале сян халэˮ тэнзхат: пыриˮ, нёяˮ, няръяна халяˮ хобахат сэдора пирӈав. Таддикахад иˮмня хатакартаˮ нувʼ сармикˮ ӈэˮ, пукˮ хобахат сертавыниˮ ӈаниʼ таняˮ. Падкоциˮ падтаˮмаӈэ мэˮян. Нюняʼ пукциˮ хобахад сэдвыниˮ таняˮмаˮ. Пускахат, пенахат сэдорасетыдмʼ. Юкад вата самляӈг поʼ тяхана падтаӈгудамзь. Мале сян падтавыниˮ тюкохона ӈыдыˮ. Лакамбойʼ Саляӈгардыхы музейхана ӈэвы картинами тэврадамзь. Тадʼ ӈанихивˮ мякадани тавыниˮ. Тедаʼ ӈацекыˮ тохолко пэядˮ, Алла Хосевна Сёяхаʼ школахана манзара, тось нись еревˮ. Анна Николаевнаʼ ныланаваʼ ялэда миӈаˮ. Тедариʼ ӈани маркана мэ. Выставкахана нята няхаюниʼ сертавыдиʼ, сэдвыдиʼ ӈулиˮ паскойˮ. Пэдава мелад нехэʼ.
Лаханакурць нями вадида хэтˮмахаданда мядондахаˮ халэˮ хобаˮ сертабавамʼ ӈадимдембись. Тырабтавыˮ пыриˮ хоб тэвравысь. Савамбовна пиделˮпидонзь. Пуна тикыдоʼ нюлкаӈэ ханˮӈаць. Ӈавхыˮ похоˮна пиделпабтоʼ халяʼ юрканя масарпасетавыдоʼ. Тюку похоˮна ӈудиˮ крем сава ӈэвы. Хобˮ пиделманзь ӈока ненэцьˮ маˮлыць. Хусувэдоʼ тарця сермʼ хорманʼ харвась. Ненэциеˮ помна ядэрмани серʼ Сёяхад ӈэдаˮ мядонди ядабтадамзь. Лариса Вануйто вэсаконда няʼ товэхэнзь. Пыда таремʼ лаханась:
— Тюкохона харданаˮ терˮ няхаюнаˮ мэӈахаʼ. Анна Лаптандерʼ небяхаюда-нисяхаюда Тамбейʼ выӈгана илеӈахаʼ. Ӈацекы ӈэванда мальӈгэхэд сэдоравамʼ харвабтада. Тарця нянаˮ манзаи манэˮмаваˮ ихиня ӈулиˮ сава ӈэˮ нивˮ. Алла Хосевнамʼ тёняна няˮӈаваˮ. Мяканда ханцетыдмʼ. Сэдвыˮ ной паныда ӈадимдембасеты. Сэдъита сававна, пирсувна хэваʼ еˮэмня мань «манекен»данда тарасетыдмʼ. Хубтыхы самляӈг часхад сэдораванзь ӈамдорцеты. Пунарка манзаяханда хэсеты, ёльце пэдава не. Паныда ӈударихина сэдыбида. Яӈга сэдора машинкамʼ ни мэсˮ.
Мелʼ неˮ манзаи манэˮман харванаˮ Горнокнязевсканʼ хандаˮ. Тикы выставкадоʼ вэбаʼ ирыʼ няхарˮ юдимдей яляʼ ӈэсондʼ манзараӈгу.
Руфина Окотэттоʼ падвы
Сидяӈгˮ: Руфина Окотэттоʼ тадтавыˮ
Авторы
Няръяна Нгэрм
Темы