Няръяна Ӈэрм
Мерʼ тэраӈголыдˮ
Хусувэй поʼ вэбаʼ ирыхына тэраӈгова мэˮӈаваˮ. Тарця вато мале танякуй похона ӈадимясь. Тюку поʼ округхананаˮ саць ненадо тэраӈгова ӈэӈгу, Законодательной Собраниянаˮ депутатад тэрабаӈгуваˮ.
Тэраӈгова ялэнаˮ няхарˮ яляʼ ямбанʼ мэтынаˮ. Вэбаʼ ирыʼ 12, 13, 14 яляхана ӈэӈгуˮ. Сяхаринда тэраӈгодаˮ ӈыхы яхана иленаˮ ненэцяӈгˮ ӈахакуд тэворцетыˮ. Мюсертаˮ ненэцяˮ мале теневаˮ, таславы яляхана тэраӈгоди ядэлана тиртя ӈаноˮ ӈэдалёртаˮ.
Хэвы сиˮив яляхана тиртя ӈаноˮ вымна тилыдаць. Пыдоʼ ты пэртяхаˮ, халядана ненэцяӈгˮ, яʼ тебтмʼ тарпрамбадахаˮ тэворӈаˮ. Ханяӈы яхана иˮмня, машинахаˮна ӈэдалёртаˮ. Ӈокханда юкад вата матˮ ёнарˮ ненэцяˮ тэраӈговахана мэӈгуˮ. Таремʼ мерʼ тэраӈговамʼ вэбаʼ ирыʼ 11 яляʼ ӈэсондʼ минреӈгудоʼ.
Россияʼ тиӈгывна тэраӈговаʼ серо няˮамбада комиссияхана мэна Людмила Маркина Салехардахана мэсь, юне тэволани лахана няˮӈась. Вадавнанда Ямалхананаˮ тэраӈговаʼ няюʼ сававна хамедываˮ. Яляʼ падарˮмана таславы яляхана малʼ харˮнаˮ инаˮ серʼ тэраӈгуртаваˮ. Законʼ ватомʼ ӈамгэхэрт серкана ниваˮ мадабюˮ. Ненадовна ӈахакуд тэраӈговаʼ няюʼ хусувэй тарана серˮ таславыˮ. Тикымʼ ёльце савуˮӈадась. Ямалʼ ӈардавна тэраӈговаʼ серо нерняʼ тидхалембада комиссияʼ терˮ сававна манзараˮ. Серодоʼ тидˮ минрейдоʼ.
Марина Яройʼ падвы
Сидяӈг: Андрей Ткачевʼ тадтавы
Авторы
Няръяна Нгэрм
Темы