обновлено: 16:30, 17 марта 2023
Няръяна Ӈэрм
Мерця’ сер’ тирӈа
Яр-саля’ тер сёбар’’ ненэць’ Яков Лаптандер Ноябрьск’ нямна ӈэдалёрӈась. Таняна Ханто’ сэркана «Ӈэрм’ мерця» сноукайтинг пирдырма миӈась. Няхар’’ юд мян сянакода’’ Ноябрьск’, Сургут’, Когалым’, Тарко-Саля’, Нижневартовск’ тер’’ ӈэвыць.
Ямалхана илена’’ «сноукайтингм’» тандая’ тохоламба пядонзь. Тюку вада’ хамэдиркартада ӈани яхад товы: ‘now — сыра, kite — нензавна хэта «мерцям’ няд’’мяць тирта сянако».
Ӈэдалёрмы нява’’ пирдырманда мальӈгана мерця ялян’ еремы. Тиртараха ӈэвы. Пыда «стандарт-м» видм’ тэравы’’, ламбитани’’ поӈгана нюртей ян’ ха’’амвы. Тет по’ ямбан’ сноукайтинг’ ва’’леро мал’’ тохолавыда:
— Нюрте’’э’ ехэрана сянакобцм’ пяб’’ни, ет’ тоенась. Мэсана ӈамгэ’ то’’олха нись ӈа’’. Парондэян’ тебсетыдм’, тю’’уку’ тисетыдм’. Пунахав хэхэдана тэдрев’ пахалав. Сянакова’’ ёльцяӈгана минрена серм’ тяхасовна тенева тара. Тикахана пирдырти нерте пиртыд. Ламбид савовна масармы’’ ӈэбто’ — харто’ хайна минда’’. Мэта’’ ембдярод мэсыдота’’ — халцукэян ӈэӈгун. Саць нядаӈгода — мерця. Мерцяр яӈгода, ӈопой яхад манзада я’’маӈгур. Нит нерня’ ереман харвабат, хусувэй яля’ пыхыдамд мэйрамбад. Мань хэ’’нё нибта ӈа’’, ибарка ӈэбта, ӈоб’’ едейкурманзь ханцетыдм’. Тикы’ хавна хубтахана сюрберцетыдм’, — Яков Лаптандер тарем’ табекурӈа.
Теда’ мяканда тэв’’махаданда таминда несэй’’ пирдырмаха’’ «ЯмалКайтан’» хамеко пэвы’’. Няхар’’ по’ тяхана Яр-Саляхана ӈобтарем’ «сноукайтинг» ӈадимясь. 2021 поход тарця пирдырмам’ сертаба пяць. Тамальӈгэхэт Россия’ ханярид сёбар’’ ненэця’’ ма’’люрць пэйдаць.
Тюку нара’ сие’’ ниць иры’ 2-9 яляха’’на ӈобт’ ма’’лёда’’. Пыдо’ мерця’ сер’ есеркана мэта ламбаха’’на едейкурта’’. Сянакованда’’, пирдырмам’ минреванда’’ мале хамеколыд’’. Тарана падродо’, манзаидо’ сертаби’’. Ямалхана тандаярка’ ӈадимы сянакубцхана Ямальской район’ тер’’ ӈани’ тараӈгу’’. Едэйвана тоходана пэвы’’ нина’’ торомбэй’’ няхатато’ нисеты’’ хаюр’’, ёльце мерецеты’’.
А.Яптик’ падвы Сидяӈг: Я.Лаптандерʼ тавы
