Няръяна Ӈэрм
Мяд’ тер’’ по
Тюку 2024 пом’ президентва’’ Владимир Путин мяд’ тер’’ поӈэ тасладась. Яна’’ тиӈгэвна хусувэй яхана ӈарка серо ӈадимдемби’’, сертаби’’. Лимбя’ ирыхына Красноярской крайхана ӈарка флешмоб «Семья семей» нюбета мэ’’ӈаць. Тикаханандо’ Ензя’ няна мяд’ теран’ таславы пом’ нэць.
Индо’ ватохона хусувэй районхана ма’’лёвы ненэця’’ буква сертабиць. Тикыдо’ ӈобт’ ӈомдахая видеороликм’ сертаць, «Семья семей» вада ӈадимясь.
Дудинка маркана юркад вата ненэця’’ ӈобт’ ма’’лыць, ӈокаюмдо’ мято’ терсавэй турӈаць. Тикы яляхана ненэциена’’ сянакурӈаць, тараць, пуна’ буква «С» сертаць. Районна’’ тиӈгы нюдяко хардахана ӈобтикы пом’ нэбтедонзь. Хатангахана ӈарка мяд’ тер ядабтамбиць. Ненадо по’ няю’ ӈадимдевы серто’ ӈока: конкурс’’, проект’’, выставка’’ ӈэдакы’’. Теда’ ӈацекы’’ е’’эмня ӈадимдевы падтаӈгурма’ конкурс миӈа, пыдо’ мято’ тер’’ нямна падта’’ми сертаби’’.
По’ ямбан’ тамна ӈока ӈавэ Дудинка маркана сертаӈгу’’. Яна’’ тер’’ мале ӈанэды’’, тадӈо’’ ӈэрм’ терӈэ сяхаринда мяна’’ тер’’ ӈока ӈэсеты’’.
Автор: Е. Ямкина’ падвы
Авторы
Няръяна Нгэрм
Темы