Мяд’ терсавэй’’ пирдырӈа’’

Ямалхана илена’’ ненэциена’’ ӈули’’ харбё’’. Пыдо’ тэри мэвахад ӈоб’’ ехэра’’. Ӈамгэри ныланава’ яляхартахана манзаидо’ таня’’. Тарем’ Саляӈгардахана илена ӈопой мяд’ тер етри’ сава серка’’на мэсеты’’.

Тандая’ пыдо’ Си’’ив харв нюбета хардан’ ядэрмы’’. Таняна юдимдей мэва фестивальм’ ӈадимдембавы’’. Тикыдо’ мяд’ тер’’ е’’эмня ӈэда ӈэвы, «Фестиваль семейного биатлона. Новый охват» нюбе’’мы. Хоротэтто еркарм’ мэта’’ мяд’ тер’’ мале тетимдей яӈорэй’ тикахана сянаковы’’. Ёльце харвабтана серканандо’ ӈани’ ва’’лёй’’. Тюку по’ Ольга хасава нюнда ня’ пирдырмэхэ’:

— Вэсакони ня’ ӈацекыни’ хуркари’’ ӈамгэхэ’’ тохоламбасетыни’. Мал’ ӈобанзер’ мяд’ тер’’ е’’эмня ӈэда’’ сянакубцха’’на мэсетыва’’. Теда’ тетимдей классахана мэна нюни ня’, Лев’ ня’ ядэрӈанинзь. «Кросс-эстафета»ӈэ нюмдевы пирдырмахана вареми’ мэ’’ӈанинзь, тетимдей ян’ ха’’мынинзь. Енермахана хэвня’ тебаманзь, ӈадьбята таславэхэд ӈокарка хунан’ сюрамба хэсь тарась. Тикы’ хавна ялани сюрберӈадамзь, нябимдейӈэ тэвываць. Несэй тунидми та’’махадандо’ ӈобкарт’ муӈгами хэвнямна нись хань’’. Самляӈг енерӈадм’, мал’ теба’’!

Ӈобт’ ма’’лёвы’’ ненэця’’ ненадо падро, медаль, тарана ӈуда’ тер ня’’амвы’’. Нумда вэварка ӈэбта ӈод’’ ялямдо’ ёльце сававна мэ’’мэдо’: сава нидо’ лаханако ня’’мы’’, ехэрана ненэцие тохолавы’’. Ӈобкана пирдырма мяд’ тер тамна ханяцей’’ мэйрамбида, ӈоб’’ няю’ нятламбида.

Тарця сер’’ Губкинский’ няна няби Надым хардахана ӈобтикы миӈаць. Мяд’ тер’’ по’ ед’, Ӈацекы’’ по’ ед’ ӈадимдембавыдонзь.

Анна Яптик’ падвы

Сидяӈг: А. Яптик’ тадтавы

Авторы

Няръяна Нгэрм

08:08, 21 октября 2024

Темы