Няръяна Ӈэрм
Мякандо’ тэвыд’’
Сыра’ ямбан’ школахана тохолко’’махадандо’ ӈота ӈод’’ тадри’ мякандо’ тэваӈгуд’’. Ямална’’ тиӈгывна вымна тиртя ӈано’’ тилыд’’. Тикыд саць тарана манзаям’ минре’’, вы’ тер’’ ню небянато’, нисянато’ ядан’ тэврамби’’.
Няхар’’ яля’ ямбан’ Роман’ Марюй’ хардахана илена хаданда ня тиртя ӈано’ ӈамдолаван’ хусувэй хубтахана’ сюрберӈаха’. Тарць’’ ямбхана ӈудиди’ ни’’ терсю’’, нянёти’ пад’’, ӈани’’ яёлоди’ тодо’’ ӈуда’’манати’ тяръядинзь. Роман си’’ив по’ Тасу’ явхы Ӈэдя’ школахана тохолкуро’’махаданда мяканда ятна. Тедари’ нарэй синё сита мале сян яля ни ӈэдарамбю’’. Ӈопой вынд’ ӈэдалёда’’ нида няндо’ тотрев’ ӈани’ тарем’ ядэрӈа’’. Яля’ ямбан’ таняна ӈамдё’’махадандо’ ӈэвто’ нибкала самляӈг час’ пиркана ӈани’ пырдари’ хадандо’ мят’ яда хэсеты’’. Пэвсюмя’ няна нумда и’’ маӈгувна синёсялворӈа. Хубтахана тохолкованзь миндядарев’ тиртя ӈано’ няю’ маймба яда’’. Хардахана синесябата ӈод’’ техэ яханандо’ нарэй сыра, нум’ ӈоб’’ то’’олсаӈэ хэвэхэ’. Я ни ӈадю’’, нум’ ни ӈадю’’. Синёхона тиртя ӈано’’ ӈэдалёрць нидо’ пирас’’.
Хададо’ нютя ню’’ и савуламба ӈопой манзеты:
— Мале ватормы тиртя ӈано ханяхарт’ ни хант’’. Я’ сяр’ ниня нум’ ирихидана’’ мэбета яӈгу, ӈамгэ’ пиракана синёда харта ханда. Ӈавна маня’’ школахадана’’ сидна’’ ты’’ ӈэхэна ӈэдалё ханласеты’’. Ханяӈэхэна сидя сян’ яля’ ӈэдалёсетыва’’, нумда вэва ӈэб’’, хадумбата тамна я’ поӈгана сеӈгасетыва’’. Тедахав’ хубтахана еся хан’ мю’ ӈамдаӈгун, пуна мале мяканд нултаӈгур. Няна саванё, тецьдахад ехэран, нин санеӈгу’’, ханя тэри сава, ӈоб’’, сидя яляхав ӈатенавы ӈэява. Хоян’, мяканда’’ тарем’ ӈод’’ тэваӈгуда’’.
Ты’’ ниць иры’ пудана яля’ ӈэсонд’ Ямална’’ тиӈгывна няхар’’ ёнар’’ сидя юр’’ ӈацекым’ вы’ мякандо’ тэвраӈгу’’. Сямянхат нерденаӈэ Ямальской районхана тохолкода’’ хоян’ тэврамба пяць. Тасу’ яв’ вынд’ сидндед юр’’ ӈацекым’ мякандо’ тэвраӈгу’’, Пуровской районхана — юр’’ тохолкодам’ небянато’, нисянато’ хэван’ хаеӈгу’’. Пэ’ хоё’’ ня’ — няхар’’ юр’’ ӈацекым’ яхандо’ тэвраӈгу’’, Муравленко’ няна самляӈг ю’’ тохолкодадо’, тикыдо’ ӈани’ тюку’’ ялэ’’ пиркана яхандо’ пяӈгудо’. Маӈгты’’ ирыхына хасаваю’’ по’’ тохолковы’’ мякандо’ тэволаӈгу’’. Харад’ ядхана илена’’ нюдо’ харто’ хосаясетыдо’.
Роман мале хойхад хаданда хардан’ вадамда телефонувна мэ’’ӈадась. Ма’’нисяв, хуняна малкованзь ханта. Икча вэнекода сита тиртя ӈано’ ядхана ядабтавысь. Малкось’ хабтедамда харта тыта поӈгад тэраӈгу. Икчанда ня’ теда’ тюку яляхад тыти’ помна янамбовна ӈэдалёрць пэӈгуху’.
Автор: Марина Ярой’ падвы
Авторы
Няръяна Нгэрм
Темы