Няръяна Ӈэрм
Мюсерта’’ е’’эмня таславы вато
Мюсерта’’ нина’’ харад’’ тердарев’ Россия’ Ӈэвахы табеко нёда иле’’. Таӈга, хынёси’’ илева таняд паӈгды. Яна’’ тиӈгэвна хусувэй тэнз харе’’ инда сер’ ханзер’’, ханяна илевамда, манзаравамда харта тасламбида. Тикы закон’’ вато’’ ня’’амбидо’, мэйрамбидо’.
Тикахад хусувэй Россия’ тер харта ӈарка падарта таня, паспортда. Хибя ӈэвада, еркарада, сяха’, ханяна соя’’мада, нюсавэй, нюсьва ӈэвада мал’ мюнянда пады’’. Тикы’ хавна сямянхат тарана — «регистрация». Тэри помнана’’ «прописка»ӈэ нюбецетыва’’, Ерв’’ ненэця’ илесь я ханяна ӈэвам’ таняд манэ’’сарӈадо’. Хардаха’’на илена илесь ёто’ ненадумда’’маӈэ хардато’ нюбе, мядото’ толыр’’ мэ’’ӈа’’. Вы’ тер, пэдара’ тер’, таӈоцяӈга’’на нядэна’’ ӈамгэм’ падаӈгу?
Невхы ила’ саиркад тарем’ таславы: ненэй ненэцяӈэ илма’’ тэхэт пере. Выӈгана, пэдарахана илена’’ ты пэртя’’ сяхаӈгарт’ ӈопой яхана пон’ ни’’ мэсету’’. Тыто’ хадо сянзь етри’ мюсерӈа’’. Недармидо’ похо’’ таславы’’. Харад’ илаӈгана тарана’’ серодо’ таславанзь хахаярка ӈэда хардахандо’ ха’’морӈа’’.
Таняна ӈаврадамдо’ тэмдаӈгу’’, тарабата лекар’’ мят’ тюӈгу’’, хабцяӈото’ танявам’, яӈговам’ таслаӈгу’’, ервхат хонравандадо’ таняб’’, ӈани’ нядандо’ хонаркода’’. Нюдо’ ӈобтикы таняна тохолкурӈа’’, интернатхана мэ’’.
Мюсерта’’ ненэця’’ паспортха’’нато’ илесь ядандо’ мюсерць ёдо’ падсеты’’. Тарем’ толаӈгур: «Сеяхинская тундра», «Гыданская тундра», тамна ӈани’’. Едэй илаӈгана тарця ӈэбта вэва. Неноховавна ӈэрм’ тер’’ е’’эмня ӈадимдембада’’ няд’’ми ня’’ма тараб’’нанда, илесь ядо’ ӈопой таславы яхана ӈэбта тара. Ӈани’ сер’ няд’’мидо’ ня’’ма нидо’ пират’’.
Паспортхана падуванда хардаӈэ вы’ тер ӈэсында хэвхана ӈэдам’ тэра пирӈа. Нермбэртяӈэ тарана’’ ерво’’ манзарась ям’ илесь яданда падаӈгу’’. Тарем’ е’’энянда ӈадимдембада’’ няд’’мида ня’’ма, тамна илаӈгана тарана’’ серода тасламба таӈга пиртада.
Автор: Галина Окотэтто’ падвы
Авторы
Няръяна Нгэрм
Темы