Няръяна Ӈэрм
Москва нянда инзелевы
Ямалʼ тер сё мэта Геннадий Салиндер Москваʼ, Московской няби Саратовской областяхаʼ нямна ӈэдалёрмы. Россияʼ терʼʼ сёётэйʼʼ ненэциеʼʼ няʼ «Пространство памяти» этнокультурной проектхана пыхыдамда манэʼʼлабтавы. Ӈэдалёроʼʼмита пуд Саляӈгарданʼ тэвыць. Тоʼʼмахаданда ӈэдалёроˮмида вадеˮӈась.
— Ӈарка ямʼ понхартʼ нив сюртембюʼʼ. Тандаяʼ Чукоткаʼ, Сахалинʼ, Камчаткаʼ, Алтайʼ, Магаданʼ, Новосибирской няби Челябинской областьʼ терʼʼ няʼ ӈобкана хыноʼʼӈаваць, тараваць. Тедалахана ими таняримна ӈа. Нянаʼʼ сырманзь товыʼʼ пеедоʼ ӈарковна муноʼʼлабтамбидонзь. Сямянхат «Увезу тебя я в тундру» сёмʼ савуʼʼӈаць. Ӈока сава вадамʼ намдаваць.
Геннадий янда терʼʼ еʼʼэмня интернетʼ мутравна видео ӈэдарамбись. Пыда сёмʼ мэʼʼӈась, нябиʼʼ нида хэвхананда ӈэрмʼ терʼʼ тарабцо манэʼʼлабтамбиць. Нянда паднанада ӈокась. Ханяӈыʼʼ маʼʼнисямʼʼ: «Ёльце хайна хыноʼʼӈа. Едэй сёдваʼʼ етриʼ мэсʼʼ, маняʼʼ концертханд тутаваʼʼ. Ӈаниʼʼ ненэциеʼʼ поӈгана ненадонʼ ӈаʼʼ».
Фестивальмʼ минрена не сита ӈаниʼ савуʼʼмысь:
— Яʼ тиӈгэвна теневабтоʼ тара. Хайнана мэбета сёхонанда ӈарка Ямаланда хурка ӈэвамʼ вадеʼʼӈа. Ӈобʼʼ пыхыдамда тохоламбабата няданда ваʼʼлёй яӈгода.
Понаʼʼ хэваʼ нерняʼ ӈаниʼ хынота. Тедариʼ ханяʼ ӈэдалавада пунси. Таремʼ ӈодʼʼ хыноʼʼмамда ӈобкана ӈатехэваʼʼ.
Анна Яптикʼ падвы
Сидяӈг: kmns89хад ханавы
Авторы
Няръяна Нгэрм
Темы