обновлено: 04:56, 02 декабря 2024
Няръяна Ӈэрм
Мутратна’’ лаханако’’
Саляӈгардахана «Ожившие легенды Севера» проектм’ ваде’’ӈаць. Ӈэрм’ тер’’ ненэцие’’ лаханако мутратнаӈэ сертавыдонзь, падта’’мидо’ илеӈгана то’’олхако’’. Тикы нерцю’’ тарця ӈадибермы яӈговы. AR-технология’’ толаӈгодам’ нядаӈгудо’, книга’ мюд вабц’’ соӈгу’’.
Книгам’ падаркана, интернет’ мутравна МТС «Строки» нюбетавна манэць, намда пиртава’’. Комикс’’ ненэй ненэцие’’, хаби’’, сыя’ хаби’’, тасу’ хаби’’ ваде’’мы’’ лаханако’’мана падвы’’. Ямидхы иле’’ми Ямал’, Тюменской область’, Югра’ тер’’ ма’’лавы’’, луца’ вадан’ тидхалевы’’ ӈэвы’’.
«Российский Север» форумхана мэвы’’ мал’’ манэ’’ӈадонзь, толабидонзь, ня’’марпидонзь. Хусувэй лаханако харта «разговорник»да, вади ханзер’’ хэтыба таравам’ табедамбада мутрада танявысь. Нюртей’’ толаӈгобцядо’ яна’’ тиӈгывна ӈэда’’ библиотекаха’’, школаха’’ ӈэдараӈгудо’. Таддикахад хаби’’ ян’, Тюменян’ ӈэдара ӈани’ тасламбидо’.
Ӈэрм’ тер’’ серо тасламбада департамент’ ӈэвахана мэна Ульяна Каленюк тарем’ лаханавы: «Тюку илаӈгана ӈацекы’’ мутратна ӈаво мэ’’ӈа’’. Ӈадьбята вадина’’ «цифровые технологии» нюбета ӈамгэри няд’’мяць лэтрамбаба’’на серо’’ӈа’’. Комикс няби «дополненная реальность» тохолкода’’ саць мэненидо’. Ӈарка бизнесм’ ня’’амбада’’ ӈэрм’ терха’’на тарана проект нерня’ минревадо’ ёльце сава. Тюку сер’’ похо’’ таняӈгу, илаӈгана етри’ тараӈгу».
Ӈацекы’’ нюдя ӈэдахандо’ харто’ вадавнандо’ ӈэда мэкад, илека книга толабабто’ тикахана вадамдо’ нидо’ юрыбаӈгу’’. Невхы’’ похот хуркари’’ вади’’ тэнз’’ лаханако няд’’мяць лэтрамбавыдо’.
Анна Яптик’ падвы
