Няръяна Ӈэрм
Мыԯтуӈ мэʼӈашˮ
Пуровскийʼ районхана ӈайта общественноеʼ движение «Ямал -потомкам!» ӈаԯка мыԯта мэʼӈаш. Общественныйʼ движениӈ мыԯан няхаԯдюˮ няхаԯ делегатˮ ӈомашˮ.
Чикиӈ камна мыԯхантоӈ Пуровскийʼ районна веԯв Кирилл Михайлович Трапезников тоӈаш, президентʼ ассоциации «Ямал — потомкам!» Эдуард Хабэчевич Яунгад, неԯьчеʼэй инициативныйʼ группам шеԯтамы Октябрина Кытымовна Агичева, шича дюˮ пуӈ Пуровскийʼ ассоциациӈ мансдям минԯемы Мария Леонидовна Климова. Ӈыԯи понанта чики общественныйʼ организацим Пюԯ дяхана диԯинаˮ нешайˮ — ненэй нешаˮ, капиˮ, вахандя капиˮ, ӈысмаˮ нятапёманта мэт шеԯтаӈатоньш.
«Ямал -потомкам!» 1988 похона инициативная группахат ӈычимы. Ӈуп пуӈ каймяхат, 28 ноябрьхана 1989 похона «Ямал-потомкам!» нимита ассоциациӈэ Пуровскийʼ районхана патӈатоньш. Четаӈ маньԯе няхаԯдюˮ матʼ пуӈ мансԯаӈа. Мыԯханантоӈ общественныйʼ движенинтуӈ мансдям минԯена Светлана Пяк докладʼ вачаӈаш, «Ямал — потомкам!» куше мансԯамаӈ деʼӭмня мунуӈаш.
Чикиӈ камна мыԯан ӈомэˮ нешайˮ дилыӈ нямна ӈайта вачиˮ тасԯымпишˮ, навэт ӈамым шеԯта таԯамам вачаӈашˮ. Четаӈ деты дилхана тасԯавтаˮ шеԯˮ дяԯиˮ тахана ӈокташтуˮ. Ненымана выӈкна диԯинаˮ, мансԯаннаˮ нешадиˮ дилм ԯэтԯампёш таԯа. Чикиӈ камна СВОхана мэнаˮ, хайноԯьш каймыˮ нешаˮ нятапёма хомаˮ. Четаӈ хаймыхина мэниˮ нятапёш общественникиˮ ӈука мансдям шеԯташтуˮ. Мыԯханантоӈ детымана ассоциацинтуӈ Правленихина, Совет старейшинахана мансԯавта нешантуӈ тэԯаӈашˮ, общественный организацинтуӈ веԯват. «Ямал-потомкам!» мансдям минԯена председательтатоӈ Андрей Игоревич Пяк тэԯаӈаˮ. Андрей Игоревич кашаԯиˮ дюˮ пуӈ Пуровскийʼ район телевиденихина специальныйʼ корреспондентӈэ мансԯаӈа.
Чикиӈ камна пыʼта государственныйʼ муниципальныйʼ управлениӈ мансдян дет тохоԯкуш. Деты мансдян чепьманта неԯьня Андрей Пяк маӈаш: «Четаӈ мани чупей кӭвханай мэмыˮ, шиʼий нятапёмы недиˮ хома шоньшахана вивхаԯьдян. Тат неԯьняӈ мансдяма ӈука ӈайты. Ӈокна мэш, ӈуп нэхэхана, ассоциацина мансдям минԯенӈама, чикехена хома ӈайты».
Лариса Айваседо патмы
Татма: Андрей Пяк таттамы
Авторы
Няръяна Нгэрм
Темы