Няръяна Ӈэрм
Немя - дилм минӆена
Чуки диӆихина маняˮ наӆка Россия дяханана немяӈ дет ӈайта дяӆям «День матери» мэштумаˮ. Чуки похона чики праздникʼ 30 ноябрьхана ӈайты. Немяӈ деʼэмня куӆкаӆиˮ хома ватаˮ тадяӈаˮ. Шаӈкмян нешаӈ немямта хумуӈата. Немя — дилм минӆена. Немя нитаˮ чупей нянанта ӈуп дёӆьшмана хомаˮ.
Маняˮ дяханана нитуӈ чиӆьниймана ватамыˮ, ватапётаˮ ниˮ ӈукаˮ. Ӈоптоӈ Римма Николаевна Пяк. Римма Николаевна четʼдюˮ шеʼӭв пуӈ чена вӭконта мят тоӈаш, таньдёӆьшкат четы выӈкай мята тум чудипита. Кыдипё кӭймянта неӆьня веӆкӆата Агичева ӈӭштуш. Часелькаӈ няна диӆиӈаш, нетаˮ каӆитаӈӭ мансӆаӈашˮ. Шиʼта вӭкодюм Николай Илекович ӈӭвтоӆьш косыдяӈаш. Четаӈ вӭконта няӈ маньӆе четʼдюˮ шеʼӭв пуӈ чиӆьниймана, хома шоньшахана нечʼ няш диӆиӈахаӈ. Дюˮ нюч, матʼтуӈ касамаˮ, четʼтуӈ — ниˮ. Тэхэʼнаˮ мансӆаннаˮ дилтоӈ каӆитаниˮ дилхат ӈинӆи. Кыдипёш кӭймяхатта Римма Николаевна куптахаӆ нишʼмы тэхэʼнаˮ мэниˮ дилант тохомай. Мяʼкайˮ ӈайвачетаˮ камна тыˮ дёӆкахана вяӆкуӆанаˮ, тыˮ ваткана тонӆапётаˮ нетаˮ няташтомай.
Римма Пяк 1979 похона вӭконта мансӆавшат «Верхне-Пуровский» совхоз мансӆаш чепьӈаш. Таньдёӆьшкана тыˮ падиӆта нешаˮ хыӆаӈ, таӈичохона ӈуп дяханантоӈ нишʼтомайˮ мыˮ. Куӆкаӆиˮ хаʼтаˮ чешчаханаˮ, дячапётаханаˮ мюшаӆьштомайˮ. Няхаӆ дяӆя кӭйны — ӈай дямтанадят. Тытоӈ писамэй веӆаштомытуӈ, писамэй мансӆаштомайˮ. Наӆаӈ няна тыˮ вачутап, тытуӈ тонӆапёш ватым мэмантуӈ дёӆьшкана мансдятоӈ тадёмшей ӈокамштомай. Таӆям вэконта тэтаˮ ӈысыхана кӭйпы, мякнанта ӈайта шаӈкмян ӈайвачетаˮ пыʼта каӆьта падеӆьштомыта. Римма Николаевна «Верхне-Пуровский» совхозхана мансӆамата стажта маньӆе четʼдюˮ матʼ пу. Хомана мансӆаманта деʼэмня, куӆкаӆиˮ наградаˮ патӆотаˮ, веӆву мимы, тадяˮ. Четаӈ тамна нитаˮ нятапёш совхоз тыˮ ӈысыхана мансӆаӈа.
Римма Николаевна дёӆьше пимшата, меӆь ни. Ӈамыӆим шеӆтапата, хӭтмайта паныдётаˮ, пемитаˮ хомана меӆь ӈӭштуˮ. Мятачеӆˮ нетаˮ — вӭкодюм, нитаˮ, кайканатаˮ чупей пыʼта шеӆтамайта пемиˮ, мюйˮ, кумшиˮ, паныдюˮ мэштуˮ. Куӆкаӆиˮ патмыˮ, матамыˮ пемиˮ, паныдюˮ хӭтмам чедимяӈа. Римма Николаевна вӭконта няӈ ничиˮ куӆкаӆиˮ ӈайватахаˮ, выӈкай дилант таӆанаˮ, тохоӆайчаньш. Каса ничˮ, ни ничˮ тотуӈ вивӈутутаˮ, дилмтуӈ чиӆьниймана минӆенаˮ, хомана мансӆаннаˮ нешаˮ. Четаӈ вӭкуӈ няӈ пыʼчи ничˮ нюувдехеˮ майпёштухуӈ. Нянаньчи ничиˮ чупей ӈуп дёӆьшмана хомаˮ. Ни ничиˮ, каӆьтуӈ дилмтуӈ минӆе ӈатахана диӆипатуӈ ӈотнаӈ, пон диӆиматуӈ мяктуӈ майпёш тоштуˮ. Вӭкодюм, нитаˮ немямтуӈ дёӆьше хумуӈатуӈ. Римма Николаевна немяӈ дет ӈайта дяӆяхана — небя дяля, куӆкаӆиˮ хома вачиˮ нятоӈ намташту. Немя — дилм минӆена, таӆям маняˮ ӈупчики Римма Николаевнам, ӈыдиˮ нитуӈ тадямэна ниˮ, чупей детуӈ ӈайта праздникханантуӈ поздравийман хайʼнаˮ.
Няӈтуӈ маман хаʼӈама: нинюта канэӆˮ, мансдетаˮ ниʼдяˮ шеʼэм, хомана диӆиӈатаˮ.
Андрей Пяк патмы
Авторы
Няръяна Нгэрм
Темы