Няръяна Ӈэрм
Ненадо пирдырма
Ӈэрмʼ терˮ серо нерняʼ тидхалембада департаментʼ терˮ ненадо пирдырмаʼ нямна юнмʼ падвыˮ. Сюдбалаˮ, сёётэйˮ ненэцие пюрӈаˮ, поӈгадандоʼ сямянхат ваˮлёйдоʼ тэраванʼ харваˮ. Няхарˮ ӈэрмʼ тэнзмʼ мэтаˮ янаˮ терˮ падродоʼ няндоʼ ӈэдабта пирӈаˮ. Тикыˮ — ненэй ненэцяˮ, хабиˮ, тасуʼ хабиˮ.
Нерняʼ хаˮамвыˮ «мастер фольклорного жанра» ненадумдаˮмаʼ падартамдоʼ няˮмаӈгуˮ. Хусувэй хибяри тарця пирдырмахана мэсь нида пирасˮ. Яʼ мидыхыд харт яхананд иленя ӈэрмʼ теранʼ, невхы лаханако, сё, илеˮми теневананʼ, илнаˮ саирмʼ лэтрамбаданʼ ӈэбат, тикахана сит конкурсхана мэвандаӈэ падаӈгуˮ. Тикыʼ хавна саць илебеянʼ вунин ӈэӈгуˮ (30 поданд хэвы ӈэбта, тикахад тамна ӈаркамбоянʼ ӈэбат).
Пирдырманʼ харванаˮ падродоʼ носиндалаваʼ ирыʼ 24 яляʼ ёльцяндʼ ӈэдабтамба пиртыдоʼ. Ӈэрмʼ терˮ департаментхана тюку адресʼ серʼ ӈатенаӈгуˮ: 629008, Ямало-Ненецкий автономный округ, г.Салехард, ул. Гаврюшина, д.17. Конкурсʼ нямна хонравандараˮ танябˮ, телефонувна лаханадаˮ: 8 (34922) 6-70-21.
Ямалнаˮ ӈардавна 26 янаˮ терˮ мале тарця ненадумдаˮмасавэйˮ. Тадʼ нерняʼ теневабцудоʼ школахаˮна, нюдяко ӈацекыˮ мэлвахаˮна ӈадимдемба пиръядоʼ. Тикытоʼ серʼ ӈарка таромʼ минреˮ, ӈэрмʼ янаˮ вади, илнаˮ саирмʼ лэтрамбиˮ.
Галина Окотэттоʼ падвы
Авторы
Няръяна Нгэрм
Темы