Няръяна Ӈэрм
Ненадо’’ ӈухуко’’
Тодо’’ тэнз’’ ненэця’’ невхы’’ похот харто’ сянакудо’ танявы’’. Тохоцяхат, пускахат, нойхат, тамна ӈани’’ ӈамгэхэт ӈухукудо’ сэдыбавыдо’. Сертабадидо’ хуркари’’ ӈэвы’’. Ханяӈэкоцидо’ тамна сеп’ мюня минарма’ ӈар’’.
Ӈобӈгуна «Ассамблея народов России»‘ тер ненэцие торомдаванзь хаядамзь. Округханана’’ тарця серм’ Галина Косыгина нерня’ пэрӈада. Пыда сидна’’ тохолкован’ хаӈась. Мастер-классм’ луца’ няби ӈысма’ тэнзм’ мэта мел’’ не хамэдавыдась. Ольга Гизатулинна хуркари тохоця’ пускаци тэвравысь. Тикыда толь’ ни’ мэ’’махаданда, тяр’’махаданда няна’’ ма’’нисяв’’:
— Сайнорма’’ невхы’’ похот таняць. Ненэця’’ я’ ханярина харто’ ёдо’ лэтмбаванзь хан’’мы’’. Теда’ ӈод’’ ӈани’ тарця илаӈгана илева’’. Яна’’ тер’’ хасава’’ ӈани’ ява’’ саюхот ӈэдабаванзь хан’’ӈа’’. Мяканандо’ пухуцидо’, небянадо’, нюдо’, ӈани’’ нидо’ ӈатена’’. Пыдо’ ялэхэ’’ пуня’ товахандо’ ена’’. Луци’’ мысыкана не’’ вэсакуто’, не ӈацекы’’ ӈацито’, некыто’ е’’эмня нюдякоця ӈухукоця сертабавы’’. Тикыдо’ ёльце янӈамгэри’’, сеп’’ мю’ паклева ӈаркоця’’. Нянандо’ тарця ӈэвы, сянакоцям’ мякданда ӈаха’’на, хэвняна мэна ненэцям’ лэтрамбаӈгуда, нядабаӈгуда. Ненэць’ мята тер ӈобӈгэв’ тенеӈгуда, тензибтембаӈгуда. Хусувэй не нюмда, вэсакомда, нямда мяканда ӈатеда. Ӈадьбята мято’ тер’’ ханяхав хэва’ сер’ няндо’ харто’ сертавы лэтра’’ма’’ ӈухукудо’ мипавы’’.
«Подорожница» нюмам’ мэта пон’ сертабада нивысь ӈа’’. Ӈарханда тохоця’ пускахат сертабада. Нибям’ мэць вэва. Ӈэвамда, пыхыдамда, ӈэда, ӈудида, мэта’’ ембдярода ниткаха’’на пэбтабинаць, мэйрамбинаць. Ниткина’’ тэри ныдпинаць, маторана ӈаво ниваць мэс’’. Сертабава’ мальӈгана сава’ няримна и’ ядэрпата таравысь. Ня’’амбада падконда мю’ я’ ютекм’, ту’ сибям’, я’ сибико, еся паклембвы’’. Падкоримда сюркарпа нибям’ мэ’’ӈаваць.
Тикы’’ ӈухукоцина’’ мякадандо’ хубта яхана мэна’’ нина’’ е’’эмня хамэдэйнаць. Ёльцянда това’ сер’ ява’’ лэтрамбада’’ няха’’на’’ ӈэдараӈгудо’.
Автор: Анна Яптик’ падвы
Авторы
Няръяна Нгэрм
Темы