Няръяна Ӈэрм
Ненэй мят ӈомаш’’
Ӈэԓм’ чеԓ’’ нешади’’ диԓивсум чедимяш таԓа. Таԓям неша нена’’, каԓтыхина диԓипатуӈ ӈотнаӈ, каԓьтуӈ культурамтуӈ ԓэтԓампёштутуӈ. Шанат тэмс нешади’’ дет тонԓюта центрхана мансԓанна’’ куԓкаԓи’’ мероприятии’’ шеԓташту’’, мастер-класс’’ ӈычимчешту’’. Каԓтыхина’’ диԓина’’ нетуӈ ныптакомаӈ мэты, мячинчетоӈ ненэй мяктуӈ ӈомташтутуӈ. Таньнякуй шеԓтамайтуӈ мастер-классхана мячинчетоӈ ниӈвидям, чеcм паӈкаԓпёш тохотаӈаш’’.
«Ямальское долголетие» нимита проектхана мэна’’ пуши’’ камна ӈашки ни’’ тоӈаш’’. Ӈаԓка нетоӈ, манԓе ӈамыԓим паӈкаԓпёш чедимяна’’, дехеԓана’’ нетуӈ тохоԓымпиш’’. Кукят ниӈвий’’ паӈкаԓпиш, кукят чеcм’’. Ӈайвамантуӈ камна мастер-классан томы’’ неӈи’’ поӈкнатуӈ дёԓимяшуӈа’’, нюԓьшментӈа’’. Мананатуӈ шеԓ: ненэй мякна ӈайваш дяԓянтуӈ кайвуну нитуӈ намт. Шеԓтамайтуӈ ниӈвидя’’, чеcм’’ дёԓьше меԓят. Таньше тохотаматоӈ таԓьша проект’ дет «Знакомьтесь: народы Ямала» тунԓы. Мэтатуӈ мятуӈ ЦНКхана мансԓана Любовь Сузьдальцева непой шеԓтамайта.
«Родные города» нимита конкурсхана мянаԓьш нэхэԓьш митумайта вешаханата мята дедят тэмтаӈаш. Таԓьша мя’’ каԓтыхина таԓаӈа. Чуки ноптухуна ԓуши’’ поӈкна диԓина’’ ӈашки’’ деняԓ нешаӈ дилм дехаԓаӈа’’. Четаӈ чики мякта шанат неша’’ мячидёԓьш тошту’’. Мякнанта ӈашки’’ тохоԓампёш меԓят’’ неша’’ куԓкаԓи’’ мастер-класс’’ ӈычимчешту’’.
Чикиӈ камна ӈаԓка’’ неша’’ тошту’’, ныптакомантуӈ мэт. ЦНКхана мансԓанна’’ шеԓтапёчитуӈ мероприятитоӈ пон виляшту’’. Таԓям таняӈ ӈаԓка неша’’, ӈашки’’ майпёш кяшту’’. Таньше куԓкаԓи’’ мастер-классыхи’’ тохоташ, таньняӈ канта’’ неша’’ вешам ниш’ту мис’’. Пы’туӈ де’эмнянтуӈ, хомана ныптакомантуӈ мэт таԓьша мероприятии’’ культурахана мансԓанна’’ шеԓташту’’.
Андрей Пяк патмы
Авторы
Няръяна Нгэрм
Темы