Няръяна Ӈэрм
Ненэй вадаваˮ паˮмя харраха
Пилюˮ ирыхына яʼ мидыхыд хартоʼ яхаˮнатоʼ иленаˮ тянё толырмʼ мэта ненэцяˮ хэбидя ялямдоʼ мэˮӈаць. Ӈэрмʼ терˮ серо минрена департаментʼ манзаранаˮ тикыʼ няюʼ мале сян ирыʼ ямбанʼ «Мы говорим на родном языке» нюбета ненадо пирдырмамʼ сертабиць.
Тет тэнзмʼ мэтаˮ янаˮ терˮ видеоролик падыбиць. Тикаханатоʼ харе вадавнатоʼ лаханаць. Сертавыˮ манзаитоʼ хурка ӈэвамʼ манэсартиˮ поӈгана «Няръяна Ӈэрм» газетахананаˮ паднана няваˮ, Анна Яптик, мэсь. Лаханакоˮ, сёˮ, тарабцоˮ ӈэдакыˮ, конкурсмʼ тидхалембадаˮ хусувэй ӈэдабтавы манзаямʼ манэˮсарӈаць.
Ӈокханда жюрихина мэнаˮ 43 видеороликмʼ няˮамвыˮ: ненэй вадавна — 20, хабиˮ вадавна — 17, ӈысмиˮ вадавна — 4, тасуʼ хабиˮ вадавна — 2. Ямалʼ тиӈгэвна 21 харадʼ терˮ теневабцудоʼ ӈадимдембавыˮ. Тюку поʼ харадʼ терриˮ нивыˮ пирдырˮ. Выӈгад тыˮ пэртиˮ ӈэсыхыт, ёртиˮ таӈоцяӈгат паднанаˮ ӈаниʼ танявыˮ.
Ненэй вадавна лаханавыˮ 8-12 потнаˮ ӈацекыˮ поӈгад Приуральской районхы Аксаркаʼ тер Тайбери Вероника няби Тасуʼ яʼ тер Салиндер Владислава пэдавахаʼ ӈэвэхэʼ. Вероника «Лабтэйко»мʼ вадеˮӈась, Владислава «Ӈамгэ халяˮ икана иле» невхы лаханакомʼ ӈадимдембись.
18 — 65 потнаˮ янаˮ терˮ поӈгад сямянхат ваˮлёйӈэ Тайбери Диана Ивановнамʼ таславыˮ. Пыда нярцоˮ нямна ӈэдаˮ табекоˮ нямна лаханась. Окотэтто Саттане Олеговна ӈаниʼ нюртей ямʼ ханавы. Ты пэртиˮ ялэˮ мальӈгана мэˮмы сёмда ӈэдабтавы. Сэрˮ ӈавканда нямна хыноˮӈась. Яндо Давид Иванович нябимдей янʼ хаˮамвы. Няданда ханмʼ ханзерˮ подерпавамʼ манэˮӈаваць. Тасу явʼ терˮ Тибичи Михаил, Салиндер Ирина ханзерˮ мякад неняӈгадиʼ пидебавамдиʼ ӈадимдембихинзь. Вануйто Любовь, Салиндер Лариса ӈобтикы таняӈы яʼ терхаʼ, пыдиʼ неʼ тучаʼ нямна лахарёмдиʼ падвэхэʼ. Ӈармыˮ ненэцяӈгат Хоротэтто Вера Яхочевнамʼ савуˮмыˮ. Сэдораванда серʼ хынотаӈэ сита падвыˮ. Инзелевариʼ пирˮ, сёда тэри хайна.
Пирдырмамʼ минревы ненэциеˮ вадавна, ӈэдабтамбавы манзаидоʼ ӈулиˮ тяхасовна сертавыˮ ӈэвыˮ. Конкурсхана мэвыˮ Ӈэрмʼ терˮ департаментхад ненадумдаˮмаʼ падартамдоʼ няˮмаӈгуˮ. Нитоʼ нерняʼ хаˮамвэхэˮ дипломдамдоʼ, ӈудандоʼ терад ӈэдабтаӈгуˮ.
Галина Окотэттоʼ падвы
Фото: Сидяӈг: Марина Ярʼ тадтавы
Авторы
Няръяна Нгэрм
Темы