обновлено: 10:42, 22 февраля 2023
Няръяна Ӈэрм
Ненэцяʼʼ вадаʼʼ яля
Ӈэрмʼ терʼʼ вади лэтраваʼ нямна етриʼ лаханаʼʼ. Неноховавна пудана сян поʼʼ ӈока серо вадиʼʼ еʼʼэмня тасламбиʼʼ. Янаʼʼ тиӈгэвна хуркари ненэцяʼʼ тэнз илеʼʼ, хусувэдоʼ хареʼʼ вадидоʼ таняʼʼнимʼʼ. Хусувэй поʼʼ сававна вадидоʼ теневанаʼʼ ненэцяʼʼ тянёворӈаʼʼ. Вадёдана ӈацекыʼʼ иринатоʼ вади ехэрэйдоʼ, теневанаʼʼ сабе лаханакурманʼ ниʼʼ харваʼʼ. Школахана ӈобтикы вадидоʼ тохоламбидоʼ, еʼʼэмняндоʼ едэй тохолкоʼ книга падыбиʼʼ.
Яра ирыʼ 21 яляхана яʼ тирʼʼ нина вадахаʼʼ таславы ялямʼ мэʼʼӈаваць. Тикы яляхана вадинаʼʼ лэтраваʼ нямна ӈокавна лаханаваʼʼ, вадёнана ненэцяӈгʼʼ тарана вади тэврамбиваʼʼ. Яхананаʼʼ хуркари серо нэбтебиʼʼ, акцияʼ, выставкаʼ ӈэдакыʼʼ. Таймырʼ ӈэрмʼ терʼʼ ненэцяʼʼ тикы яляхана вадахандоʼ таславэдоʼ ӈокась. Хусувэйдоʼ нянанда мэкадмʼ тэрабись.
Тикы яляхана«Арктический центр культуры» нюбета харданʼ Дудинка интернатʼ школахана хойʼ терʼʼ тохолкуртаʼʼ мядонзь ядэрӈаць. Таняна ӈацекэхэʼʼ илека сянаковамʼ сертаць, таддикад падна мэта книгаʼʼ выставкамʼ манэʼʼлабтаць. Елена Кумивна Евай, центрахана манзарана, ӈацекэхэʼʼ вадаваʼʼ сававна теневаваʼ нямна лаханась. Мядонзь ӈарка нябакода, Антонина Ивановна Неняӈг турӈась. Ӈавнанда пыда ӈацекы тохоламбадаӈэ школахана манзарась. Тикыʼ хавна вэсакомда няць, Михаил Александрович Неняӈгʼ няʼ, тохолкодиʼʼ еʼʼэмня книга падыбихинзь. Книгидоʼ выставкахана таняць, тедаʼ ӈодʼʼ школахана тохолко мэйдоʼ. Ӈолёкоцяʼʼ ӈацекэхэʼʼна паднана ненэцьмʼ манэць ёльце илекась. Антонина Ивановна няндоʼ лаханакомʼ вадеʼʼӈась, школахана манзаравы пода тензебтесь. Ӈацекыʼʼ харетоʼ вадавнандо сё мэʼʼӈаць, стихотворенияʼʼ вадеʼʼӈаць.
Таремʼ Ензяʼ няна вади лэтраваʼ еʼʼэмня ӈадимдевы ялямʼʼ мэʼʼӈаваць.
