Няръяна Ӈэрм
Неԓьняӈ вивинтоԓьш диԓе
Пуровский районхана чиԓьниймана диԓина’’, мансԓанна’’ неша’’ ӈука. Ӈоптоӈ Артём Семёнович Пяк. Артём Семёнович нета’’ няш Ханымей’ няна, «Хаԓёта» дякуӈ кявхана диԓе. Таӈичохона мя’’тачеԓ’’ ненэй мят мэшту’’, хыԓаӈ дётэхэта мемыта пяй мякна диԓешту’’.
Маньшту, понантоӈ тэхэнатуӈ мюшаԓьштуш, четаӈ дяӈ тамна буравой’’ ӈычимя’’, таԓям ӈупдяханантуӈ мэшту’’. Артём Семёнович ниԓихийта -катахайта ватамы. Четаӈ пыта выӈкай дилант таԓана куԓкаԓи’’ ӈайватам шеԓтамам чедимяӈа.
Артём Пяк дёԓьше шейта дямалана, пимшата, чиԓьний нешаӈ. Дилта дямпан каԓиташ мансԓаӈа. Понанта общинахана мансԓаштуш, четаӈ каԓьта катамайта каԓита’’ миштута. Мя’’та кявхана ӈайта дякуувдим дёмпёш каԓиташту’’. Выйнуй ӈамтамыта дюмта неԓьчеэй хыԓаку’’ дёԓьшат мэштута. Маньшту, вит ӈука ӈяп дякуувдехена’’ каԓя’’ чидюм’шту.
Ӈукамана хыԓаӈ каԓиташту’’. Каԓитама — таԓьша мансдя, нешиӈ ӈука’’ каԓям катанаӈа, чикехена мансԓаманта митат ӈамы вешауди’’ конӈа. Каԓитаманта камна Артём Семёнович каԓьта тыта’’ падеԓьшту. Тытоӈ хыԓаку’’ кааммахат манԓе ӈомташтутуӈ. Тышипёй выӈкна, петаԓахана диԓинана ниӈа, таԓям тыувдетоӈ пон ԓэтԓампёштутуӈ. Ненымана таӈичохона тыӈ ԓэтпёма шеэмӈа. Недяӈк, пинԓю падиԓмаӈ камна дячапётахана тэӈи’’ топаӈ кавшаӈкана канаԓьштут. Чикиӈ камна пу’’ тахана’’ ты’’ шехэ’’ вомты’’. Четаӈ выӈкна кадюта хома дя’ дику. Нешади’’ дётыдю кяв дя’’ чупей ԓуши’’ вомтамы, ту’’ паԓатамы.
Таԓям чуки ноптухуна неша’’ шан ниш’ту’’ мюшаԓ. «Тышипёй’ нешиӈ выӈкна диԓеш нита пилас. Ты нешаӈкна диԓивсу. Ты нешаӈ дилхана — ӈамаԓ, мя’’, паны’’, кан. Таԓям четаӈ нешаӈи’’ тыувдетоӈ ԓэтԓампёштутуӈ», — маньшту Артём Семёнович.
Выӈкна диԓина нешиӈ дилта хомаӈаймя нехет ӈа. Артём Пяк дилта минԓеш кявхананта мэнадюм нятапита. Пушадюм дёԓьше меԓь, куԓкаԓи’’ выӈкай ӈайватам ни дехеԓа. Пыч’ хома шоньшахана неч’ нядяч’. Пушанта няӈ ничи’’ шаӈкмян выӈкай ӈайватан тохоԓампёштуч. Артём Семёнович маньшту, ӈаԓтана ӈашки’’ шиниӈкуй ниԓинатуӈ дилм чедимяматуӈ таԓа.
Четаӈ куԓкаԓи’’ деты ӈамы’’ нешаӈ дилхана ӈычимя’’. Каԓват няӈ каймян хапнантоӈ мяктатоӈ машинахана кяшту’’. Чуки похона Артём Пяк мятачеԓ’’ няш ԓуши ӈамԓу — картофель ватапёш чепьӈаш. Чикита хыԓаку’’ неԓьшуна нэхэдяташ. Шанат патку’’мян картошки’’ нэхэӈа. Маньшту, таԓьша ӈамаԓ выӈкна ватапёш неньшаԓ, ты’’ танпёта дя хома таньше картошкам ӈамтанахана. Четаӈ неԓьчеэй чепьмата, навэт ӈай ӈыди ӈамԓу’’ ватаваньш вивиты.
Нум хыԓямахат ӈисыханантоӈ мансдятоӈ ӈокамшту. Тытуӈ ӈомтамахататоӈ, Артём Пяк нета’’ няш ӈай каԓиташ чепьны. Таньше шиниӈкуй ниԓината дилм нёташ, неԓьняӈи дилханта вивинтоԓьш чиԓьниймана дётэханата диԓе, мансԓаӈа.
Андрей Пяк патмы
Авторы
Няръяна Нгэрм
Темы