обновлено: 12:15, 27 сентября 2024
Няръяна Ӈэрм
Нерняӈы яляндо’ е”эмня
Тодо’ яхат товы’’ илебей ненэця’’ Яр Саляхана форуман’ ма’’люӈаць. Пыдо’ сертаванда манзаидо’ (проектадо’) яромбэй няхато’ манэ’’лабтамбиць. Тикы’ е’’эмня грант ня’’марпиць. Тада сидя яля форумдо’ миӈась.
Тодо’ яхат товы’’ илебей ненэця’’ Яр Саляхана форуман’ ма’’люӈаць. Пыдо’ сертаванда манзаидо’ (проектадо’) яромбэй няхато’ манэ’’лабтамбиць. Тикы’ е’’эмня грант ня’’марпиць. Тада сидя яля форумдо’ миӈась.
Няхар’’ яля’ ямбан’ пыдо’ сертавы манзаидо’ няхато’ манэ’’лабтамбавы’’. Тикы’ хавна тамна ӈани’’ ехэрана иӈуд сертабаван’ сидто’ тохоламбавы’’. Тэв’’махадандо’ нидо’ торомдамба сянаковы’’. Тад пуна нябимдей яляханандо’ проектадо’ ваде’’мы’’. Хусувэндо’ харта хардахананда, яхананда тидхалембаванзь тасламбавыда. Мале няхаромдэй яляхана хибя нерня’ ха’’амва пунумась. Юкад вата ӈопой ненэцям’ тэравы’’. Ӈокханда сидя ёнар’’ мат’’ юр’’ хасава ю’’ ӈопой грант’ есям’ е’’эмняндо’ мэвы’’. Ямалхадна’’ няхар’’ ненэй нява’’ грант ня’’амавы’’. Тикы’’: Казымкина Милена — ненэй не, Пахомова Наталья, Тасьманова Анастасия. Сертавы манзаидо’ яханато’ ӈарка таром’ ха’’авраӈгу’’.
Нини’’ поӈгана мэвани мальӈгана мале сян нями лахана ня’’ӈадамзь. Нюрте’’э’ Самбургхад товы Пахомова Натальям’ индя ядэробцо’’ нямна хонрадамзь. Пыда вадада тарцясь:
— Пыхыдами грантм’ ня’’муванзь тосадамзь. Лаханавани мальӈгана сёнзяни мюня мэйрыдамзь. Яханана’’ илебей нина’’ тохоламбаӈгува’’. Сянакова’ яляхана хано’’ масеро сертабаӈгува’’. Тамна ӈани’’ ӈавори сэдыбаӈгува’’ма’’. Теда’ Яр-Салян’ товами ихиняни сава. Ехэрана ям’, ненэцие манэ’’ӈад’’ма. Ӈоб’’ иӈудм’ мэта нини’’ ня саць тарана серона’’ таслава’’.
Пяку’’ я’ няд товы Милена Казымкина индя ядэробцо тарем’ хэтыдась:
— Мань грантм’ ня’’муванзь нидамзь пунрё’’. Тедахав саць тарана серми ма’’лев’’. Ими таӈга! Ӈули’’ маямбидм’! Тарка Саляханани’ ӈацекы тара тохоламбаӈгудм’. Тикы е’’эмня тараванда ӈавори тэмдаӈгудм’.
Нито’ проект’’ пэрман’ няби’’ ӈобт’ ма’’лёхоя’’ нянандо’ ӈамгэ таравам’ ваде’’мы’’. Таня’ товы’’ илебей ненэцие’’ поӈгана тыретана ва’’лёй ненэй не нява’’, Дарья Салиндерм’ ядабтадамзь. Нями тэри ӈоб’’, сидя вадам’ мэ’’эмдавэй нивась ӈэдара’’. Хуримна хонрамбивась. Пыда тарем’ мась:
— Яр — Салян’ нюртей товами, мань тэри пысэяваць. Тюку ян’ тэворп’’, манэ’’манда ӈока ӈэвы, ненэйвана ненэциедо’ пачо. Илебей’’ ненэця’’ тарем’ ма’’лёва ӈули’’ сава. Ӈока тарана ӈамгэм’ манэ’’ӈадм’. Тарем’ манзараван’ харвана’’ ӈока’’, ханяӈыдо’ тандая’ тохода’’. Мань ӈод’’ тохолкудамзь. Тэв’’махадана’’ няхар’’ мэлвахана мэваць. Ӈопой мэлвахана нюдямбой хардахана тараванда серо тохоламбиць, соя’’ма паӈгадо’ ханяд ӈэвам’ тасламбиць, тамна ӈамгэм’ пирмамдо ваде’’ӈаць. Мань тарем’ хамедав, проектм’ серта таслаб’’, ӈоб’’ нерня’ минре тара.
Тюку форум илебей ненэцие’’ няю’ нюртей тидхальцяӈэ тарая. Саць пиртидо’ несэй серо тасламбуванзь ма’’люрӈая’’, ёто’ няна тараванда манзаи нерня’ минрея’’.
Автор: Руфина Окотэтто’ падвы
Сидяӈг: Р. Окотэтто’ тадтавы
