Няръяна Ӈэрм
Нешаˮ шанаʼко мянаԯяˮ
Чуки диԯиӈ кашемʼ дюˮ дяԯяхана каԯьтуӈ дяханатуӈ куптат, дискат диԯинаˮ нешадиˮ дет тонԯюта дяԯя. Чики хома дяԯя чадюˮ нешадиˮ тэмс каԯьтуӈ дилмтуӈ, ватамтуӈ дюԯмаӈ тайхана, няхаԯ дюˮ шича пуӈ чена шеԯтамы. Маняˮ Пюԯ дяханана чики дяԯям шанат каԯват таʼамна мэштутуӈ.
Ӈэԯмʼ чеԯˮ нешадиˮ ныптакомаӈ, поӈкнатуӈ шанаʼкомаӈ мэт Таԯкахана мянаԯма дяԯям мэʼӈашˮ. Чуки «Год здоровья» нимиʼта похона ӈука нешаˮ мянаԯмантуӈ мэты ӈомаˮ. Таԯкахана диԯинаˮ нешадиˮ камна Самбуԯкахат, Каԯпюԯкат, Каԯясамэхэт, Ханымейхат, Муравленкахат, Тазовскийʼ районхат мэнаˮ нешаˮ тоӈаˮ. Ӈопшеԯ шеӭвʼдюˮ шеӭв мянаԯтаˮ. Кукиты чуват выӈкат томыˮ. Нюӈк ӈаймямтуӈ, нэхэмтуӈ конуԯпёшь вяԯкуԯоԯьш, хаʼмоԯьш, нэхэԯумпёш, этнобиатлонхана мянаԯьш чепиԯяшˮ.
Неԯьчеэй вяԯкуԯоԯяшˮ. Хампԯяӈк минутахана няхаԯмэмаӈ коноԯьштутуӈ. Мянаԯтаˮ нюӈкмана вяԯкуԯоԯяˮ. Няхаԯʼдяӈкня — хампԯяӈкʼдяӈкня потуӈ ӈайта ӈашкиˮ няхаԯʼдяӈкня метрʼ кункана патԯата няԯяӈпаӈк вяԯкуԯпиˮ. Ӈашкиудиˮ дёԯьше хомана мянаԯяˮ. Ни ӈашкиˮ поӈкна ӈайвахай местамʼ Анна Агичева канаӈата, каса ӈашкиˮ поӈкна — Николай Пяк. Матʼдяӈкня — шеӭвʼдяӈкня потуӈ ӈайта ӈашкиˮ, ӈаԯка нешаˮ вяԯкуԯпётатуӈ няԯяӈпаӈк купташуна, хампԯяӈкʼдяӈкня метраӈ кункана патԯаӈа. Кукитыˮ шанԯиӈ ниԯештутуӈ.
Ни ӈашкиˮ поӈкна Екатерина Яптунай нэхэԯя, каса ӈашкиˮ поӈкна пиԯи нюӈкмана Владимир Агичев вяԯкуԯоԯя, пыʼта ӈайвахай местамʼ канаӈата. Ӈаԯка нешади поӈкна вяԯкуԯоԯтаˮ касамахатˮ Семён Вануйто нэхэԯя. Пыта ӈука мэмаӈ няԯяӈпаӈк вяԯкӈа. Нимимты мянаԯматоӈ -няхаԯ хаʼмхана хаʼмуԯма. Няхаԯ хаʼмхана хаʼмуԯтаˮ, няхаԯʼдяӈкня — хампԯяӈкʼдяӈкня потуӈ ӈайта ӈашкиˮ поӈкна ӈайвахай местамʼ Дарина Сергун, Николай Пяк канаӈачʼ. Матʼдяӈкня — шеӭвʼдяӈкня потуӈ ӈайта ни ӈашкяхӭтˮ Екатерина Яптунай ӈайвахай местанʼ каʼамӈа, каса ӈашкиˮ поӈкат Руслан Пяк нятаˮ чеӈ хаʼмай, пыʼта нэхэԯя.
Ӈаԯка нешаˮ ӈупчики нюӈкмана мянаԯяˮ, ниˮ поӈкна Наталья Королевич нэхэԯя, касамахатˮ — Николай Пяк. Нэхэԯумпютаˮ ӈупчики нюӈкмана мянаԯяˮ. Няхаԯʼдяӈкня — хампԯяӈкʼдяӈкня потуӈ ӈайта каса ӈашкяхӭтˮ Андрей Айваседо нэхэԯя. Матʼдяӈкня — шеӭвʼдяӈкня потуӈ ӈайта ӈашкиˮ поӈкна Самуил Казымкин ӈайвахай местамʼ канаӈа. Нэхэԯумпютаˮ ниˮ поӈкна — Августа Павлова нэхэԯя, ӈаԯка каса нешадиˮ поӈкна — Семён Вануйто ӈайвахай местамʼ канаӈа.
Шуԯвиԯьш няԯяӈпаӈк вяԯкуԯпиˮ
Четʼты мянаԯматоӈ — «Этно-биатлон». Таӈичохой таԯьша эстафетаʼ хыԯы мянаԯмахат ӈинԯи. Нешаˮ пям няʼампёшь шуԯвиԯяˮ. Мянаԯтаˮ шуԯвиԯьш матапёмытуӈ ӈотакотуӈ дямп, стадионмана ӈайта ӈотакомна шанат мэмаӈ шуԯваштутˮ. Таньше шуԯвиԯмантуӈ поӈкна мянаԯтаˮ няԯяӈпаӈк тыньшахана вяԯкуԯпиˮ. Кимя шан мэмаӈ ниԯиӈата, таӈок мэмаӈ штрафной круган кӭштуˮ. Чики пӭшкотԯям шеԯтамы ӈотакотоӈ кунта дюԯˮ метрʼ кун.
Таньше мянаԯма неньшаԯ ниӈа. Чики эстафетахана няхаԯʼдяӈкня — хампԯяӈкʼдяӈкня потуӈ ӈайта ни ӈашкиˮ поӈкна ӈайвахай местамʼ Нэлли Покачева канаӈата, каса ӈашкяхӭт — ӈай Николай Пяк нэхэԯя. Матʼдяӈкня — шеӭвʼдяӈкня потуӈ ӈайта ни ӈашкиˮ поӈкат Екатерина Яптунай ӈай ӈайвахай местамʼ канаӈата. Каса ӈашкиˮ поӈкна Иван Пяк нэхэԯя.
Этнобиатлонхана мянаԯтаˮ ниˮ поӈкна ӈайвахай местамʼ Наталья Королевич канаӈата, каса нешаӈкатˮ Василий Салиндер нэхэԯя. Пиԯи путаш этнобиатлонхана мятчеԯˮ дет ӈайта эстафетам шеԯтаӈаˮ. Хампԯяӈк мятчеԯˮ мянаԯяˮ. Неԯьня касаˮ стадионмана шуԯваштут, шуԯпяш патԯатаˮ няԯяӈпаӈкуˮ диԯт нуԯаштут, тыньшахана няԯяӈпаӈк вяԯкаштуˮ. Чикехет ӈай шуԯваштут, тайˮня пушахатуӈ тыньшахаӈотуӈ миштутуӈ. Ниˮ ӈупчики стадионʼ шуԯпяш маташтуˮ, няԯяӈпаӈк вяԯкаштуˮ, чикехет нихиˮтуӈ тыньшахаӈотуӈ миштутуӈ. Ӈашкиудиˮ ӈупчики нешанатуӈ-немянатуӈ шеԯ мянаԯяˮ. Мянаԯтаˮ маньштуˮ таньше шанаʼкома неньшаԯ ниӈа, чикехӭна ӈотнаӈ дёԯьше вильӈа. Мятчеԯˮ дет ӈайта эстафетахана Самбуԯкахат мэнахаӈ Артём, Нина Тэсида нюувдемчʼ няш нэхэԯяхаӈ. Нимимты местам Каԯпюԯ няӈат, выӈкат томэхӭӈ нешихиӈ Евгений, Татьяна Пяк каса нюувдемчʼ няш канаӈач. Пыʼтуӈ ӈупчики хомана мянаԯяˮ. Няхамты местан Таԯкахана диԯина Вячеслав, Анжела Пяк мятчеԯ каʼамдят. Пыʼчи нюувдемч няш дёԯьше нюӈкмана мянаԯяхаӈ. Мянаԯьш хитамахататоӈ хомана шанаʼкомыˮ, вяԯкуԯоԯьш, хаʼмоԯьш, нэхэԯумпёшь, этнобиатлонхана ӈайвахай няхаԯ местам канамыˮ, тотуӈ мячисыˮ — медалюˮ, дипломʼ патԯуˮ няʼамӈаˮ.
Чикиӈ камна мянаԯьш нэхэԯмыˮ ассоциацихит «Ямал-потомкам!» вешаӈ дет ӈайта сертификатуˮ няʼамӈаˮ. Мянаԯмыˮ нешаˮ маньштуˮ: таньше ӈопт ӈома, мянаԯьш шанаʼкома дёԯьше хома шеԯ. Ӈэԯмʼ чеԯˮ нешайˮ дет тонԯюта управленихина мансԯаннаˮ, спорт дет тасԯёта управленихит мэнаˮ, ассоциацихина «Ямал-потомкам!» мансԯаннаˮ ӈуп нэхэхана дёԯьше хома, вильта спортивныйʼ мероприятимʼ шеԯтаӈаˮ.
Лариса Айваседо патмы
Авторы
Няръяна Нгэрм
Темы