Няръяна Ӈэрм
Нешаӈкна’’ дюничаԓяш
Ӈамыԓи нешиӈ нянта куше диԓимам нянанта дёԓимяшо’, дюничаԓьш намтнаӈата. Таԓям Пюԓ дяна ӈаԓка веԓв Кирилл Михайлович Трапезников маӈктата нешай’’ мятумана дятыԓяш. Ханымей’ няӈи выӈкна диԓина’’ Пяк веԓкԓата нешай’’ мя’кна мячидёԓяш.
Таньняна диԓина’’ неша’’ калитаӈа’’, каԓьтуӈ тытуӈ падиԓя’’. Районна веԓвы нешаӈкна’’ дёԓимяшуӈаш. Дилтуӈ нямна дюничаԓьш куше диԓимамтуӈ намтпишь. Неша’’ куше диԓимамтуӈ вачаӈаш’’, ӈамы’’ тасԓавта шеԓутуӈ тадяӈӭймям кэ’тӈаш’’.
Чикиӈ камна диԓишатуӈ дянтуӈ нямна ӈайта вачитуӈ вачаӈаш’’, выӈкна диԓина’’ нешаӈк мичиԓпёта’’ ӈамыку’’ де’эмня мунуӈаш’’. Неша’’ маньшту’’, чики ӈамыку’’ камна халаку’’ пичипёшь мэта таԓа. Таӈичохона апы’’ дятынԓаштут. Каса нетуӈ тытуӈ падиԓтан, куна каԓитанан, ни’’, ӈашкиуди мя’кна каԓьтуӈ кадёшту’’. Халакуӈ мяту’’ няӈ топ, куше каԓьтоӈ кутӈатуӈ. Таԓям халаку’’ пичипёшь мэта ӈамыку ӈаԓкамана таԓа. Пюԓ дяна ӈаԓка веԓвхана нешай мяту’’ нямна, маня’’ неша’’ нена’’ ӈупчики дятыԓяш’’. Выӈкна мансԓанна’’ нешади’’ няӈтуӈ мэмы’’ ваче’’ патдятоньш, тат неԓьняӈ ӈокна тасԓамантуӈ мэт.
Чуки дилхана дилма пу’’ тахана ӈинԓимшту, куԓкаԓи’’ деты шеԓ’’ ӈычимшту’’, таԓям таньше нешаӈкна дилтуӈ нямна дюничаԓма хома.
Андрей Пяк патмы
Авторы
Няръяна Нгэрм
Темы