Нидоʼ нядабиˮ

Сёяха лаӈгʼ ниня ӈобˮ ӈарка мядмʼ мяраць. Тарабцода мале сэванʼ ӈади, таняюʼ харадʼ терˮ, ненэй ненэцяˮ сарпямʼ танӈадонзь. Ныланаваʼ яляхана мятоʼ якэ трубаʼ сивна ялянда сэв ӈадивоˮмахад тюˮуʼ путра. Харадˮ терхана ненэй мяд саць таравы.

Тикы серо теневана юнета нямдоʼ Лариса Николаевна Вануйтамʼ лаханако няˮӈадамзь.

- Хардахана илениˮ поӈгана хареˮ ненэй манзаидоʼ сертабаванʼ харванаˮ таняˮ. Илеваʼ тэхэˮна мюсермыˮ ненэцяӈгат ненэй мядʼ мюня мэванʼ харванаˮ ӈани ӈока ӈэсетыˮ. Тарця ненэциенаˮ ненэй мятʼ харваˮ, ӈадьбянаˮ мядмʼ мяраваць. Таняʼ ныланаванзь яляхана ханӈаваˮ. Маняˮ выʼ иламʼ мэненаваˮ.

Малʼ — манзаранаваˮ, хэˮлиʼ турць ниваˮ пирасˮ, ханяӈына пиʼ манзараˮ, пыдоʼ яляʼ мяканаˮ тось пирӈадоʼ, таӈга мэятаˮ. Харданаˮ терˮ поӈгана мэятанадамдоʼ, сэдоранадамдоʼ пюняˮ ӈабидерӈаˮ. Ненэциенаˮ сертавы манзаидоʼ няндоʼ мирдапа пиръядоʼ. Ихинани вадамбойʼ мирдаӈгуртаˮ ненэцяӈэ хандаˮ. Мале ӈопой няваˮ Людмила Олеговна Вануйто мирдаӈгурманда няюʼ тарана падрода сертэйнаць. Ӈобˮ грантмʼ, юрˮ ёнарˮ есямʼ нэкалӈась. Сэдора мэта машинкадамда тэмдаванʼ харва.

Тикыʼ хавна лэхэт мирць харваваˮ. Янамбоковна тоходаваˮ. Тедаʼ нюртей тарця ӈавэ сертаба пяваць. Тад нерняʼ тяхасовна тасламбаӈгуваˮ, ханзерˮ тамнаʼ тяхаʼ манзараӈгуваˮ. ханзерˮ ӈобкана тикана мэбˮнанаˮ нинаˮ ниваˮ лаволамбаӈгуˮ. Ненэйвана мелʼ нинаˮ тохолкова минреӈгуˮ. НКОмʼ сертаваць. Тадриʼ нюдя пэвдей ирыхына НКОхоˮ таславыˮ грантˮ еся помнандоʼ матопаӈгуˮ. Едэй сертавы организация матˮ юрˮ ёнарˮ есямʼ нэкалць пирӈа. Тедаʼ ӈобтʼ маˮлёванʼ харваваˮ таслаӈгуваˮ, ӈамгэʼ тоˮолха проектмʼ падыбаӈгуваˮ. Ӈока проектˮ поӈгад ненадо ӈэбта, тикахана ненадумдаӈгудоʼ.

Тедаʼ хоб тэвраць. Мэядаӈгунаˮ, пунаʼ тарецейӈэ сэдаӈгунаˮ. Тикахавад есеӈгунаˮ. Ӈодˮ ненэй мятʼ харвана неˮ нянаˮ тось пирӈаяˮ, ӈобкана сэдораӈгуваˮ, мэятаӈгуваˮ. Тедариʼ таӈы мяˮмаˮ мяры, тарецейваˮ яӈгу.

Тадӈоˮ хойʼ терˮ ненэцяˮ тулыдˮ, пыдоʼ сиднаˮ ӈаниʼ нядабаӈгуˮ. Пухуцяˮ набакодамдоʼ парадаванзь турцетыˮ. Тикарˮ ӈаниʼ тарана ӈамгэ ӈэˮ нивˮ. Нядаӈгода хасава пядаваˮ пэпиˮ, ӈаˮи хубтахад мале пэтыдоʼ, маняˮ тэри хорʼ мюʼ мэӈгунаˮ.

Мяˮмаˮ тэри харˮнаˮ харвобцохонанаˮ мяраваць. Ӈулиˮ сававна сертаваць. Мяˮнаˮ ӈэбцьмʼ харданаˮ ерв Станислав Леонидович Вануйто табедась. Ӈацекынаˮ турӈаˮ. Мэятаˮ, нядаӈгуˮ. Сиднаˮ интернетмʼ нядˮмяць мале ӈани яхана теневаˮ. Серˮ тарцяць, хасаваˮ някмʼ хадаць. Юртя харадʼ мюня пиремба саць ӈабте, ненэй мякнаˮ тэврадонзь. Тикаваˮ интернетвана манэˮлабтаваˮ, тадˮ сававна таслаˮ, ӈулиˮ тарана ӈамгэ ӈэвы. Яʼ ханярид паднаˮ, сиднаˮ хонрамбиˮ: «Някʼ юрмʼ мирдапидаˮ?» Маˮнивамʼ: «Миртя сян ӈэвахад тедариʼ ехэраваˮ. Маняˮ харˮнаˮ помнанаˮ тярӈаваˮ».

Тикы сермаˮ тамнаʼ тяхаʼ нерняʼ минреӈгуваˮ. Ӈэсынаˮ нюмда яӈгу. Яр-Саляхад нянаˮ лаханаць. Таняна маˮнимˮ: «Живаем на Севере» сайтхана нюмдамдо таслаяˮ». Новой Портхад ӈаниʼ лаханаць. Таняна ӈобтикы мядмʼ мярванʼ харваˮ.

Мяˮмаˮ тидпойʼ хибяхарт нида маниеˮ. Хусувэваˮ хареˮ индя харвобцохона турӈа, таромʼ хаˮаврамби.

Таславанда серонаˮ чатхана вадеˮянаˮ, тарабата таняна помнанаˮ серонаˮ тасламбиваˮ. Хибя мякна мэ, хибя ӈамгэʼ тоˮолха манзаямʼ сертаӈгу. Хибяхартаваˮ пуняʼ ни ӈаˮ.

Марина Ярʼ падвы

Сидяӈгˮ: Лариса Вануйтоʼ тавыˮ

Авторы

Няръяна Нгэрм

10:40, 10 ноября 2023

Темы