Няръяна Ӈэрм
Нипы’’ дяԓя
Чиԓта’’ халаку’’ тоӈа’’, пома’’ таӈичуӈ няӈ шатхаԓьдят. Чейня нипы томахат тасам капи’’ кайвюча дяԓямтуӈ мэ’шту’’. Неԓьчеэй катамайтуӈ шеcв няпымтоӈ ӈуп ӈаԓка детан пиԓештомытуӈ. Чики дяԓяхана каӈуԓонташту’’, поӈкнатуӈ шана’ко мянаԓьшту’’.
Шиниӈкуй ниԓинатуӈ дилм, культурам’ Пюԓ дяханана диԓина’’ тасам капи’’ хомана ԓэтԓымпитуӈ. Таԓям чейня Таԓкахана чиԓта’’ халаку’’ дет’ ӈайта дяԓям шеԓташту’’. Чуки похона капиди’’ кайвюча дяԓян ӈука тэмс неша’’ тоӈаш’’. ЦНКхана мансԓанна’’ нипы’’ дяԓян дёԓьше хомана ӈанатамэт. Вильта концерт шеԓтаӈаш’’, куԓкаԓи’’ кынсу мэ’ӈаш’’, таԓаӈаш’’.
Капиди’’ обряд’ ӈычимчеӈаш’’, ви’кат панчота кычам ӈамтаӈаш’’, чиԓта’’ халакууди’’ вичаԓмаӈ мэты. Тум тавстаӈаш’’, шеcв няпыӈ ӈамсам пиԓиӈаш’’, няпыӈ дюԓкна тун каӈуԓонтӈаш’’. Детхат няпыӈ выдим четӈаш, тай’’ня кычан мэхадяш куй’ку ӈыԓ ӈамтаӈатоньш. Выдинтуӈ пеԓям кычаха четхадяш таньняӈ томы’’ нешай’’ та’амна мичиԓпитоньш. Капиди’’ кайвюча дяԓяхана таньняӈ томы’’ неша’’ шиниӈкуй каӈуԓонтма шеԓу’’ шеԓ куй’кон дяԓнасай видяуди’’ шаԓӈаш’’. Вяптуӈ тадя ӈаймя мэт, дилтуӈ тат неԓьняӈ хома ӈаймя мэт, таньше понантуӈ капи’’, неша’’ каӈуԓонташтомай’’. Центрхана мансԓанна’’ шанат тэмс нешай ватамана кынсу’’ мэӈаш’’, таԓаӈаш’’.
Чикиӈ камна ӈашки’’ поӈкнатуӈ мянаԓмаӈ мэты’’ куԓкаԓи’’ шана’ку’’ шеԓтаӈаш’’. Ӈашкиуде’’ майпёш шана’куш. Ӈынхана дятоԓьш тохотаӈаш’’, ваттахана каԓи’’ нямаԓпёшь шана’коӈаш’’, вяԓкуԓоԓьш ты’’ нямтхи’’ дюсни’’ нятпиш’’. Нипы’’ дяԓям мэ’мантуӈ неԓьня капиди ӈухуку’’ шеԓтапё мянаԓяш’’. Куԓкаԓи’’ ӈухуку’’ шеԓтамай.
Таньше мянаԓьш нэхэԓмы’’ тотуӈ мячисы’’ няамӈаш’’. Тасам капиди’’ кайвюча дяԓям шанат тэмс неша’’ хома шоньшахана мэӈатоньш, нипы’’ дяԓян томы’’ хомана ныптакуш’’. Таԓьша шиниӈкуй шеԓо ӈаԓтана’’ ӈашки’’ чедимямаӈ мэт ӈычимчешту’’.
Андрей Пяк патмы
Авторы
Няръяна Нгэрм
Темы