Нядаӈгудамзь

Тана’’ пудана яляха’’на Харпхана сюрберма «Северный характер. Трейл» ӈэсеты. Тюку по’ яӈгась. Сюрберманда’’ ненэця’’ «Ледник романтиков» сэрер няд манзадаць. Сиддо’ машинахана таня’ тэвраць. Пуна Харп’ ӈэсонд’ сюрамба тэвбато’ серо’’ӈась.

Сянамбой яля’ хаё’’мяхад таславась, мань нини’’ поӈгана мэӈгудм’, нядаӈгодадм’. Таславы яляхана Эльвира Ӈокэй Обской ӈэсонд’ ӈэдалэйни’. Хуняна тет чахана юркыни’, яля’ сэв тандая’ юркотась, мат’’ часхана сидни’ хосаяна машина тось. Харпхад тамна’ тяха’ трэколхана хаява’’. 30 километр’ пирт’ тэвбани’ сюрбертыни’ пэдара’ поӈгана пон’ ӈатейнинзь. Пэдарахана савась, лэ’’мороко’’ мун’’ соць, ха’’ни’’ хэвхана нибярё’’, неняӈг’’ тёры’’ӈаць, ламборо’’ тирӈаць. Тэри мяд’ мюня ӈамдёва’ то’’олха нись ӈа’’, ныланана то’’олханинзь. Пэ’’ хой’’ хаця’’ ӈадиць. Ӈани’’ нини’’ мэсь я’’ таӈго’’ ӈэвыць, яндо’ пан’ ӈадьвысь, ханяӈэхэв’’ пэ’’ поӈгана тю’’укуна мэвыць. Пэвсюма’ си’’ив час’ ӈэсонд’ сюрамбада ненэцие падыбининзь, хусувэндо’ ненадумда’’мам’ падбани’ тарась. Мал’ хэвувнани’ ханпато’ серо’’ӈась.

Яля’ ер’ пиркана нюртей’’ няхар’’ сюрамбада’’ ӈадимя’’, мани’ няндо’ ёльце маининзь. Тикахавахад етри’ ӈадиберць пэйдаць. Нернякуна мэнахабидо’ тамна таӈга миӈаць, 30 километрм’ хаевэрха’’ ниць ӈа’’. Пуданаркахабидо’ тэтнаць, ӈэдо’ есьмыць, енвыдаць, ядри’ пэрӈадонзь. Мимандо’ сер’ хонаркунинзь, ма’’нисям’’: «Тюкор тоенаркавы, саболцавэй ид’’ ӈока’’, пэ’’ сацьри саблюй’’, танаба’’, яд’’ я’’авлы’’, ӈэм’ ланзьдева’, мо’’нава’ пир’’». Ханяӈыдо’ няни’ лаханаць: «Тарси’’ я’’авлада сюрберць сехэрэдва’’ сертавэди’». Ӈэдо’ вэнзер’’ танхалмы’’ таняць, пуня’ ниць ӈа’’, едядо’ ӈамгэхэртаӈэ нидонзь пэр’’, тамна’ тяха’ сюрамбиць.

Тарем’ нувани сер’ ӈока теневана нини манэ’’ӈадамзь. Ехэрана’’ ненэцяӈгарт’’ нядни хонаркуць: «Тюку по’ пыдар ӈамгэ нин сюрамбю’’?» Тэри пысаӈгадамзь, ханяд си’’ми теневабто’. Пуна таслав, небой сюрберць ня’’мы’’ нини’’ хонарку’’. Тамальӈгана Ямальской район’ терхат мерета’’ яӈгуць.

Нядаӈгодаӈэ мале ӈокаваць, сидя’’амна нуваць. Ӈаврадава’’, итва’’, неняӈг’’ пардондава’’, ӈамдёрцядана’’, сарё’ паныдана’’ таць. Хубтахана тецись, пунахав тад ядеманда, тамна сяни хоба, ӈуди’’ни’’ хоба’’ пармвыдаць. Яля’ ямбан’ пэдара’ поӈгана мэва нянани тоенахава нивэсь тоена’’. Ӈопой сюрберта падыбаб’’ тоенаркась. Лакри’ мандал’’мана турта’’ таняць, ёльце мер’ паднана’’ ниць ӈа’’, ханяӈы’’ сидни’ паромламбиць, вэвакоркавна вахалаӈгаць. Сава’ сер’ тадтаӈго мэтами нянани ӈась, сидни’ ёльце нядась, хусувэй ненэцям’ тадтамбининзь, тарем’ ӈобкартадо’ падувдавэй нись ерев’’.

Ӈокханда хэвувнани’ 77 ненэця’’ хаяць, мале сяндо’ сацьри тоенаванда нид сюрамбавамдо’ ёльцевэдонзь. Команда’’ поӈгана Тасу’ я’ тер’’ нина’’ нябимдеяць. Неновна ӈахат товы’’ нина’’ Тасу’ я’ тер’’ командандо’ тер’’ мал’ ненэй ненэцяць.

Харе’’ сюрамбаб’’ хурка’’ я’’амна хан’’мамдо’ теневаӈгур, теда’ харе’’ манэ’’мадавэй’’ пунсярка. Тарем’ таслаб’’, тэри нядаӈговахарт сава, таром’ ха’’авравами саваӈэ тасламбив. Ненэй ненэця’’ сюрберта’’ ӈокаць, Сёяха’, Яр-Сале’, Аксарка’, Салехард’ тер’’ таняць.

Ӈанине Яптик’ падвы

Сидяӈг: А. Яптик’ тадтавы

Авторы

Няръяна Нгэрм

06:50, 13 сентября 2024

Темы