обновлено: 03:12, 28 октября 2024
Няръяна Ӈэрм
Нядˮмамдоʼ несэймдавэдоʼ
Мюсертаˮ, нядэнаˮ ӈэрмʼ терˮ еˮэмня сава вада ӈадимя. Яʼ мидыхыд хартоʼ яхаˮнатоʼ иландоʼ саирмʼ тамнаʼ тяхаʼ минревандоʼ еˮэмня илаӈгана тарана ӈаворидамдоʼ няˮамсетыˮ. Тедаʼ тикы нядˮмамдоʼ хаця несэймдаӈгудоʼ.
Ямалʼ тиӈгэвна иленаˮ ӈэрмʼ терˮ тодо илаʼ сехэрымʼ нёдаˮ. Выʼ терˮ, пэдараʼ няна иленаˮ ненэй ненэцяӈгартˮ иландоʼ яӈга. Иландоʼ тытоʼ хадоˮ хурка ӈэвахат пере.
Вымна мюсертаˮ ӈопой яхана ниˮ нуˮ, етриʼ ямданавамдоʼ мэˮӈаˮ, таславы недармидоʼ нёдаˮ, таремʼ тыдоʼ лэтамба поʼ ямбанʼ илеˮ. Таремʼ мюсерць нянандоʼ иле мяӈэ невхы поʼ серʼ ненэй мядˮ саваˮ. Иландоʼ сибёмдемба едэй мутры тохоламбиˮ. Мерета еся ханодоʼ, тамна ӈани ӈавэдоʼ таняˮ. Ӈадьбята округнаˮ серо няˮамбадаˮ сидтоʼ нядаба нядˮмаӈэ ненадовна выӈгана мэˮманда ӈаворидамдоʼ мипиˮ. Ненэцяˮ тикы нядˮмидо ӈэрмʼ терˮ серо минрена управлениеʼ манзаранахат няˮамсетыдоʼ. Ёльцянда тобˮ, падродоʼ сертаванзь, харданʼ хаˮамсетыдˮ. Неноховавна ты пэртиˮ сянаковаʼ ялэˮ мальӈгана тасласетыдоʼ, законʼ ватоʼ серʼ нядˮмидоʼ няˮамсетыдоʼ.
Таремʼ мюсертаˮ нинаˮ законʼ ватовна тарцяˮ ӈаворидамдоʼ няˮма пирӈаˮ: еядамдоʼ, ӈудамдоʼ, хордамдоʼ, латадамдоʼ, нойдамдоʼ, парасиндамдоʼ, электростанциядамдоʼ, едэй ихибцие, пардонсавэйˮ лабтэйдамдоʼ, тамна ӈани таранадамдоʼ. Ӈокханда толырманандоʼ — сидя юˮ няхарˮ ӈавори.
Ӈока янаˮ терˮ пэдариˮ няна илеˮ. Мюсерць ёдоʼ тянё. Ӈадьбятоʼ мале таславы мядырмидоʼ мэˮӈаˮ. Сырэй мэлваханатоʼ ненэй мядʼ еˮэйӈэ пяхад мивы балокадоʼ ӈабтамбиˮ. Тикыдоʼ етриʼ ӈопой яхана ӈаˮ. Нидоʼ мюселембюˮ. Тикыʼ хавна тэсипой хаёвы нинаˮ таняˮ. Пыдоʼ нядэ хаюрӈаˮ. Таремʼ ӈопой яхана иленаˮ, иле мяӈэ ӈобтикы харадʼ мядо савуˮӈаˮ. Ханяӈыˮ балок мятандоʼ сертабиˮ. Ӈаниˮ хартоʼ ныхытоʼ пирувна пя хардакодамдоʼ мимбиˮ. Тарця мяд ӈарка тецьдахана сава.
Тедаʼ округхананаˮ еˮэмнандоʼ яӈга нядˮми ӈадимдець. Тикыдоʼ пя хардакодоʼ мимбабатоʼ ёльце тараӈгуˮ. 2025 поход пилиˮ нерденаӈэ Пуровской районʼ терˮ хардатоʼ мюня мэˮманда хордамдоʼ, хардатоʼ махалэйʼ синдˮмяӈэ «металлочерепица»мʼ, еся тебдамдоʼ няˮмаӈгуˮ.
Надымской районхана нядэнаˮ ӈобтикы ӈокаˮ. Нареʼ, Ӈыдʼ хэвхана ёртяˮ ненэй мядотоʼ хавна сырэй нумгана пя хардакохонатоʼ илеˮ. Едэй юн нянандоʼ ӈулиˮ ненадо.
Шурышкарской, Красноселькупской районхана ненэцяˮ тарця нядˮмамдоʼ мале 2020 поход мэˮӈадоʼ.
Г. Окотэттоʼ падвы
Сидяӈгˮ: М.Ярʼ тадтавыˮ
