Няръяна Ӈэрм
Няхато’ тэворӈаць
Хахаяда яля’ Россияна’’ президент Вламдимир Путин Чукоткан’ ӈэдалёрӈась. Пыда таня’ нюртей тэвавы. Ӈамгэ’ пиркана маня’’ округхадна’’ ӈэрм’ тер’’ ӈани’ тэворӈаць.
Россияханана’’ ты пэртина’’ Союз’ ӈэвахана мэна Михаил Едайкович Яр, тамна ӈани ненэця’’ Ямалхадна’’ Чукотка’ няю’ ӈэдалёрӈаць. Чукчито’ ня’ ӈобкана ты’’ ила’ нямна лаханакурӈаць. Пыдо’ таняна чучка’’ ханзер’’ тыто’ пэрмам’ манэ’’сарӈаць.
Анадырь маркана ты пэртито’ серо тидхалембада ерводо’ тасалковам’ мэ’’ӈаць. Михаил Едайкович вадамда хэтась. Пыда ханзер’’ Ямалханана’’ вакана ты пэрмам’, ханзер’’ округхадна’’ ты пэрманзь хэвы ненэця’’ Камчаткахана манзаравамдо’, ӈамгэ’ то’’олха серо ӈобкана минревамдо’ ваде’’ӈась.
Тасалкобито’ хавна Чукотка’ ӈэрм’ тер’’ Ассоциация’ ненэцие ядабтаць, тикы нито’ ня’ ӈани’ ӈобкана таславандидо’ танявыць.
Автор: Марина Яр’ падвы
Авторы
Няръяна Нгэрм
Темы