обновлено: 10:56, 25 февраля 2026
Няръяна Ӈэрм
Няматаԓакуԓма дяԓя
Дюԓкат ва’та шичадю’’ шеӭв тыӈкан’’, хампԓяӈк команда’’, шичадю’’ шитчет’ ненэй мят’’. Пуровский’ районхана няматаԓакуԓма дяԓям мэ’ӈаш’’. Таԓкан мянаԓмантуӈ мэты шанат дяхат мэна’’ неша’’ ӈомаш’’.
Чуки похона хампԓяӈк команда’’ — Самбуԓкахат, Каԓясамэхэт, Ханымейхат, Каԓпюԓкат, Таԓкахат мэна’’ мянаԓяш’’. Праздник найпёш культурахана мансԓанна’’ деты постановкам’ «Оленевод — сила Ямала» ӈычимчеӈаш’’. Чикиӈ пут сценаӈ кӭвмана кан’’ мансхаԓяш’’. Чуки похона парадхана ӈопшеԓы шича дю’’ шитчет’ тыӈ кан’’, неша’’ мюшинатԓям ӈуп пумна миньдяш’’. Тытуӈ топдяма’’, канутуӈ дёԓьше мэкат’’. Чикехет праздникан томы’’ веԓв’’ нешади’’ поздравийпёш мунуӈаш’’. Таԓкахана ты’’ падеԓьш мансԓани’’ дяԓям Пякупур нимита дяхаӈ няна ӈайта пуԓ ӈыԓна мэ’ӈатоньш’’.
Праздникан томы’’ хомана ныптакомаӈ мэты таняӈ шичадю’’ шитчет ӈок мяту’’ меӈаш’’. Куԓкаԓи’’ ӈамыдю шеԓтаӈаш’’, шанат пԓощадка’’ мансԓаӈаш’’. Мянаԓта’’ неша’’ шича дяԓяӈ дямпан поӈкнатуӈ мянаԓяш’’. Чуки похона дюԓкат ва᾿та шичадю’’ шеӭв тыӈкан’’ няматаԓакуԓяш’’. Неԓьчеэй дяԓяхана няматаԓакуԓта’’ масс-стартхана ӈуп диԓьшуӈ мансхаԓяш’’. Таньше ӈуп диԓьшуӈ ӈайтаԓёма неньшаԓ ниӈа. Ӈука нешади’’ маныдеш куки’’ ты’’ шехеԓэхэт ӈатан шуԓхаԓьштуташ.
Таньше ӈайтаԓёш мянаԓчи’’ поӈкна ӈайвахай местам Ханымейхат мэна Виктор Пяк канаӈата. Пы’та финиш’ дёԓьшат мат’ минута чет’дю ӈуп секундахана тайвай. Нимимты местан ӈупчики Ханымейхат мэна Вячеслав Пяк ка’амдяш, пы’та неԓьчена няхатата ӈуп секундамна хатхаԓьдяш. Няхамты местам Самбуԓкахат мэна Сергей Хатанзеев канаӈата. Нимимты дяԓяхана ӈопумана ӈайтаԓёта’’ мянаԓяш’’. Ӈопумана ӈайтаԓёта’’ касами’’ поӈкты Ханымейхат мэна Владимир Пяк ӈайвахай местам канаӈата. Ни’’ поӈкат тыӈ кан’хана ӈайтаԓёш ӈайвахай местан Жанна Агичева ка’амдяш.
Шича дяԓяӈ дямпан мянаԓта’’ шана’куш’’. Вяԓкуԓоԓяш’’, нэхэԓумпиш’’, няхаԓ ха’мхана ха’муԓяш’’, шалди’’ ӈыԓна нюмкупёԓьш нетуӈ конуԓпиш’’, этно-биатлонхана шуԓвиԓьш мянаԓяш’’. Каԓьтуӈ детуӈ мянаԓчи’’ поӈкна няхаԓ ха’мхана ха’моԓьш, этнобиатлонхана мянаԓьш, кан’ну’’ нимня ха’моԓьш ӈайвахай местам Самбуԓкахат мэна Афанасий Тэсида канаӈата. Пы’та праздникхана удостовереним’, знак’ «Мастер спорта России по Северному многоборью» ня’амӈа. Ӈокна командахана мянаԓтахат’’ няхаԓ ха’мхана ха’моԓьш Каԓпюԓкат мэна Николай Пяк нэхэԓя, кан’ну’’ нимня ха’моԓьш Самбуԓкахат мэна Анатолий Вора ӈайвахай местам канаӈата. Этнобиатлонхана шуԓвиԓьш Ханымейхат томы командахат мэна нэхэԓя’’. Няԓяӈпаӈк вяԓкуԓпёш Самбуԓкахат томы Иван Вануйто хомана вяԓкуԓоԓяш, пы’та ӈайвахай местам канаӈата. Ӈокна мянаԓтахана’’ вяԓкуԓоԓьш Таԓкаӈ командахат мэна Филипп Пяк ӈайван ка’амдяш. Каԓьтуӈ мянаԓтахат’’ шалди’’ ӈыԓна нюмкупёԓчи’’ поӈкна Алексей Кунин нэхэԓя. Ӈокна мянаԓтахат шалди’’ ӈыԓна нюмкупёԓьш Каԓясамыӈ командахат мэна Евгений Пяк ӈайвахай местам канаӈата. Каԓьтуӈ нэхэԓумпёш мянаԓтахат’’ ӈайвахай местан Дмитрий Айваседо ка’амдяш. Ӈокна командахана мянаԓтахат’’ нэхэԓумпёш Каԓпюԓкат мэна Леонид Пяк нэхэԓя. Тыӈ канхана ӈайтаԓё ӈайвахай местам’ канамы’’, шана’ко мянаԓьш нэхэԓмы’’ тотуӈ миԓита’’ мячисы’’ ня’амӈа’’. Чуки похона мянаԓмы поӈкат ӈайвахай местам ӈай Самбуԓкахат мэна команда канаӈата. Нимимты местан Таԓкахат мэна команда ка’амдят, няхамты местам Каԓпюԓ команда канаӈата.
Выӈкна, каԓтыхина диԓина’’ нешаӈкна’’ няматаԓакуԓма — пиԓи хома ныптакома дяԓя. Шанат тэмс неша’’ ӈопт ӈомшту’’, куптат ниня манымайтуӈ нетуӈ, диԓюнатуӈ кошту’’, няханатуӈ дёԓимяшошту’’, поӈкнатуӈ шана’кош мянаԓьшту’’. Праздникан томы’’ хомана ныптакомаӈ мэт культурахана, спортхана мансԓанна’’ куԓкаԓи’’ мероприятии’’ шеԓтаӈаш’’. Няматаԓакуԓма дяԓяӈ вильма мэт шанат предприятии’’ нятакуш. Чуки похона куԓкаԓи’’ праздникхана тадяӈаш. Ӈашки’уди’’ шана’комаӈ мэт шанат площадки шеԓтаӈаш’’. Меԓь ни’’ конкурсхана «Ямальский колорит» ненэй паныдётуӈ ӈычимчимпиш’’. Куԓкаԓи’’ матамэй’’, меԓьмана шеԓтамы’’ паны’’, пема тадяӈаш’’. Кынутаха’’ дюньшиԓеман ха’та’’ «Напевы тундры» нимита фестивальхана кынучи’’ мэта’’ кынсыхи’’ дюньшиԓеӈаш’’.
Чикиӈ камна няматаԓакуԓма дяԓяхана шича свадьбам’ мэ’ӈаш’’. Павел и Софья Пяк патнаӈаханьш, Тимофей и Алёна Айваседо ӈопт каймямч дяԓямч мэӈаханьш. Няматаԓакуԓма дяԓян томы’’ неша’’ хомана ныптакуш’’. Чики праздник’ шеԓтапёш предприятия ТЭК нятакуш. Ӈука неша’’ няматаԓакуԓма дяԓям маныдемаӈ мэты «Пуровская медиагруппа» шича дяԓяӈ дямпан трансляцим’ минԓеӈаш. Куше чики праздник’ мэсумам Пурмедиа интернетмана ӈычимчеӈаташ.
Автор: Андрей Пяк патмы
