Няръяна Ӈэрм
Нятакома дюнь
Выӈкна диӆинаˮ нешайˮ дилхана каӆитама куптат тадяӈайта мансдя. Чуки ноптухуна каӆяˮ чидюмаˮ. Понантуӈ каӆясамыˮ нешай дёӆиӆьшат дякуˮ, каӆитавшат токушаˮ каӆяшаӆмаˮ. Нешаˮ дяӆиˮ тахана каӆиташ мансӆаптуӈ ӈотнан, ӈамычеэй вешам нишʼтуˮ няамˮ. Таӆям четаӈ маняˮ Ямалханана каӆиташ мансӆаниˮ нятапёштутуӈ.
Чуки похона каӆитаниˮ деʼэмня деты нятакома дюнь ӈычима. Таӈичуӈ дямпхана Хаӆякаӆтыхит мэнаˮ веӆвыˮ выӈкна диӆинаˮ нешадиˮ ӈысымана дятыӆяшˮ. Шеӭв муниципальныйʼ округханаˮ выӈкна диӆинаˮ нешаӈкат кашемʼдёнаӆ ӈок вачиˮ ӈомтаӈашˮ. Ӈамы мансдянтуӈ, дилтуӈ дет таӆамам, каӆитанаˮ чупей ӈаӆка веӆвхиˮ вачадятоньш. Четаӈ выӈкна диӆинаˮ нешадиˮ, ненымана каӆитаниˮ, куше няташатоӈ манӆе Хаӆяӈкаӆтыхина тасӆаӈатоньш.
Тат неӆьняӈ мытʼта, пыӆя, нику — таӆьша каӆиˮ миӆ вешˮ ӈоктандятуӈ. Таӆьша каӆиˮ ӈуп килограмм миӆ (136) дюӆкат ваʼта няхаӆдюˮ матʼ вешаӈэ кӭйныˮ, чики неӆьня (120) дюӆкат ваʼта шичадюˮ вешаш. Чикиӈ камна каӆитанахаˮ мичиӆпёчитуӈ мини-электростанцитуӈ миӆ вешˮ ӈоктаныˮ. Неӆьчеэй шитчетʼдяӈкня дёнаӆ вешаш, навэт няхаӆдюˮ дёнаӆ ӈокӈэ кӭйныˮ. Четы няпаӆпёмытуӈ ГСМтуӈ вешˮ ӈупчики ӈоктандятуӈ, шичадяӈкня дёнаӆ вешаӈэ тасӆайтоньш. Каӆитанаˮ пон викня, ӈанум мэш мансӆаштуˮ, таӆям спасательныйʼ панытатуӈ тэмтамантуӈ мэт няхаӆ дёнаӆ вешам няамныˮ.
Чикиӈ камна 2027 похот каӆьтуӈ дяханатуӈ диӆинаˮ, тэмстуӈ чадю нешаˮ, каӆиˮ дет ӈайта патаӆ патватмыӈ каӆиташтоныˮ. Шаӈок каӆиˮ ӈамӆатуӈ катамантуӈ дет тасӆëта патаӆ шан нишʼтоныˮ патанˮ. Чики хома шеӆ выӈкна диӆинаˮ нешаӈкнаˮ ӈаӆкамана таӆаӈа. Чикиӈ камна нешайˮ нюˮ, мансдяӈ дет тохоӆкотаˮ, Ямалхана ӈупчики нятапитуӈ.
Чуки 2025 похот мансдяӈ дет очно тохоӆко чепьмыˮ ӈашкиˮ, неӆьчеэй тохоӆкош вузʼхиˮ каймы, шитчетʼдюˮ дёнаӆ вешам няамнаӈаˮ, таньдет патаӆ патмыˮ ӈэптоӈ. Таньше округма мансдян тохоӆкотаˮ Ӈэӆмʼ чеӆˮ ӈашкиˮ нятапита. Таӆям нятакома выӈкат, петаӆахат мэнаˮ, мятуӈчеӆˮ ӈука ӈайта, нешанатуӈ, немянатуӈ чадю вешам мансӆаш нямаӆпётаˮ ӈашкиˮ дет тасӆамыˮ. Чики няаммайтуӈ вешаханатоӈ ӈаӆка каӆтыхинаˮ диӆишатуӈ мятуӈ миӆ митченӈаˮ. Чикиӈ камна панытатуӈ, тохоӆкош мэсутатуӈ ӈамыкотуӈ тэмтанаӈа.
Чики хома шеӆ округна ӈаӆка веӆв таньше тасӆамы. Чуки похот четыдяӈ мансдяӈ дет тохоӆкош хитамы ӈашкиˮ, бюджетныйʼ организацихиˮ мансӆаш чепьпатоӈ ӈупчики таньше нятапётдятуӈ.
Лариса Айваседо патмы
Авторы
Няръяна Нгэрм
Темы