обновлено: 07:38, 19 сентября 2024
Няръяна Ӈэрм
Нюдя ӈацекы тохоламбаӈгу
Ӈыд хардахана школам’ манэ’’манзь тюдм’. Си’’ми ядэлавы нями Лилия Юрьевна Артеева ӈока илека ӈавэ ваде’’ӈа. Ӈацекы’’ иландо’ сяхаӈгарт’ ӈопой яхана ни ну’’. Теда’ таӈы ныланаваханандо’ мэ’’. Школаханандо’ сиддо’ тохоламбадари’’ мэ’’, едэй пон’ хамеку’’. Ӈопой тохолкова кабинетхана нянани’ илебей некоця торовата. Лахана ня’’ӈами’. Адер Мария Михайловна ӈэвы.
— Мань Ӈэрм’ терадм’, ненэй недм’. Самбургхад тодамзь. Тобольскхана тохолковами ёльце’’махадани’ манзаядми пюрць тюкон’ тэвыдамзь. Харни ини сер’ тарем’ таславась. Нядаӈгардахад тиртя ӈанохона тодамзь.
— Ӈыдхана нюдя ӈацекы тохоламбада таравам’ ханяд намдасар? Маси’’ сит хибяхав табедавакы?
— Интернет’ мутравна «Труд всем» сайтхана юнм’ толадамзь. Тикы’ пуд телефонувна Ӈыд’ школан’ лаханадм’. Сомбовна хонрав: сяха’ тось тараӈгу, ханяна илеӈгудм’, хурка ӈацекы тохоламбаӈгудм’. Хусувэй тарана падро си’’ми серта табеда’’. Ӈадьбяни Тарко-Салехана лекар’’ мят’ ядэрӈадм’. Ӈаворини хосаяванзь Тобольс март’ хаядм’.
— Тюкона мятамд таса’’?
— Ӈацекы тохоламбади’’ иле хардахана иледм’. Янамбовна мяни мюйм’ савумдамбидм’. Ӈока ӈамгэм’ тэмда тараӈгу.
— Хурка ӈацекы тохоламбаӈгун?
— Тетимдей классахана мэна ӈацекэхэ’’на манзараӈгудм’. Мал’’ интернатхана илена’’ ненэй ӈацекы’’ ӈэрха’’. Тикым’ ихинани саву’’ӈав. Тарця манзаям’ харвобтав, ӈадьбяни илни саирӈэ тэравась. Ӈахат нюдя мяӈгни сянако няцетыдм’. Яля’ няю’ ӈэда серк’’ табедамбасетын, тараванда мальӈгана тидхалембасетын. Ӈадьбяни тэравы манзаяни тэнзм’ саӈговотаӈэ нив тасламбю’’.
— Несэй ехэрана ян’ хэвандаӈэ сит мят’ тер’’ ниса’’ табламбю’’?
— Небями ханяцей си’’ми саву’’ӈась. Тюкона теневана нини’’ иле’’. Ӈули’’ ӈопойхавадм’ нидм’ ӈа’’. Мань тамна тохолкодадм’. Английской, луца вадам’ минренаӈэ ӈэван’ харвадм’. Яӈганя вади торомдамбавам’ харвабтав. Харни вадами ӈобтикы саваркавна мэйра тара’’. Тикы’ е’’эмня хадами, ирими няць ненэй мякана илесетыдм’. Теда’ тоенаркаӈгу. Хэвханани мэна’’ нини’’ луца вадарим’ мэ’’ӈа’’. Тохоламбуванда ӈацекыни’’ поӈгана вадамдо’ теневана’’ танябцу’’. Тарцяха’’ енадм’. Сидто’ лахана нятадм’.
— Теда’ манзаяхананд ӈамгэм’ пэрӈан?
— Тохолко лохони мюйм’ хамедамбидм’. По’ ямбан’ сертавандини тасламбидм’, падарт’ падыбин. Ӈацекыни’’ тедари’ выӈгана мяканато’ мэ’’. Тадри’ тиртя ӈано ӈэсы’’мана тилаӈгу. Ӈатенадм’, е’’эмнандо’ толаӈго книгыдо’ ма’’ламбидм’. Нюбедо’ мале теневын, падаркана толэйнась. Хурка’’ ӈэбцу’’, ӈэрм’ тер ӈэвами нянандо’ сава ни ӈэӈгу’’? Нина’’ торомдаӈгува’’ма’’.
Лаханакурмана’’ пуд тарпыни’. Ими ӈули’’ саву’’ма: «Мара’’ Мария Михайловнам’ торомдавэми’. Тандая’ тохолковамда ма’’левы илебей некоця харта Ӈэрм’ яханда товы. Ёльце саванё! Ӈацекына’’ хар’’на’’ яна’’ тер тохоламбаӈгу».
Галина Окотэтто’ падвы
Сидяӈг: Г. Окотэтто’ тавы
