Нюдякоця’’ тохолкода’’

Выӈгана илена’’ ӈацекы’’ школан’ хэвандо’ нерцюна тохолкован’ хамеко пир’’ӈадо’. Е’’эмняндо’ яӈга тохолковадамдо’ хамедамби’’. Тандая’ Ямалханана’’ тет группам’ нэвыць.

Тюку по’ самляӈг ю’’ ты пэрти’’ ӈацекы, мат’’-си’’ив похо’’на мэни школан’ хамеда тасламби’’. Сиддо’ лимбя’ ирыхыд ты’’ ниць иры’ ӈэсонд’ Белоярск’, Ӈэдя’, Антипаюта’, Пэ Саля’ школа-интернатха’’на тохоламбаӈгу’’. Пыдо’ лакамбой’ хардахана мэсь пиртадо’. Тикы иӈу’’ небой по’ округна’’ ӈэвахана мэна ервана’’ Антипаюта харад’ вымна ӈэдалёрма’ мальӈгана ӈадимясь. Пуна тикы’ нямна ты пэрти хонрамбиць, вадавнандо’ мюсертахат савари вади намдавыць. Ӈэрё’ Панаевск’ няби Сёяха’ няна тарця’’ группа’’ манзаямдо’ пяць, теда’ серодо’ тид’’ миндаӈэ ваде’’ядо’.

Ӈэрм’ тер’’ серо тидхалембада департамент’ ерв Ульяна Каленюк тарем’ лаханавы: «Округханана’’ школан’ хэванда’’ нюдяко’’ ӈацекына’’ хасава ю’’ иры’’ ямбан’ тоходанбато’ серо’’ӈа’’. Таддикахад хусувэй хибя нюмда таӈок’’ ялэ’’ пирт’’ ӈэдарамбаван’ нида харва’’. Мюсерта’’ ненэцие’’ е’’мня школа-интернатха’’на самляӈг ирын’ таславы группа нэсь идейваць».

Нюртей классан’ хэванда’’ е’’эмня яӈга тохолкова’ программам’ сертавы’’, сямян пэрманда серодо’ тикан’ падвы’’. Ма’’ним’’, мякатато’ ӈаркамбой’’ классаха’’на мэна’’ нито’ ня’ тэволаӈгудо’, ханабаӈгудо’. Тохолко ёдо’, етя няндо’ таславы лоходо’ ӈани’ таня’’. Хэвханандо’ некыдо’, нябакудо’ мэӈгу’’, нюдяко нидо’ маниеӈгудо’, нядабаӈгудо’. Ненэся тарем’ едэй илам’ таӈга торомдаӈгудо’.

Вэба’ ирыхына 2025 похона тарця’’ группа’’ ӈокамда тасламбидо’, хасава ю’ пирӈэ ханда’’. 2026 похона округна’’ ӈани’’ школа-интернатха’’на ӈобтикы ӈадимда’’.

Ӈокханда Ямална’’ тиӈгывна сидя ю’’ самляӈг школа-интернатва’’. Тикахана няхар’’ ёнаркад вата’’ ты пэрти’’ ӈацекы’’ тохолку’’, хасава ёнар’’ си’’ив ю’’ самляӈгадо’ нюртей классаха’’на мэ’’.

А. Яптик’ падвы

Авторы

Няръяна Нгэрм

06:09, 26 января 2025

Темы