обновлено: 10:46, 09 октября 2024
Няръяна Ӈэрм
Нюдрев’ тидхалембида
Маня’’ нина’’ нара’ Москвахана торомдэйнаць. Пыда школахана тидхалембада хасава ӈацекэцямда ӈэрм’ тер’’ фестивалян’ тэвравысь. Тикада ӈока нита поӈгана ненадовна ӈадись. Тикы’ нява’’ — Алиса Дмитриевна Неркахы. Пыда Тасу’ явхы Хальмер’’ Седе’ школахана ӈацекы тидхалемби. Сяхаринда харе’’ манзаямда интернет мутрам’ няд’’мяць манэ’’лабтамбасетыда. Алиса Дмитриевна етри’ ӈацекыда няць ет’ ханяхав ӈэдалёрӈа, хуркари мэкад серо минре, пирдырми ӈани’ нидо’ юрыбю’’. Мани’ лахарёми’ тарем’ пяминзь:
— Ӈацекы ӈэвани мальӈгана Сэхэряв’ няна вадыдамзь. Та’ таӈоцяӈгана мэсетыва’’. Ӈацекэӈэ мяканана’’ сидндетваць. Самляӈг хасава нями, сидя не нями. Нисями нюдяко ӈацекы тохоламбадаӈэ тохолкусь, ӈули’’ сёбар’’ ненэцянзь. Сяхаринда ӈули’’ пыдаван’ харвасетыв. Пыда си’’ми поӈгарць, поӈга пюддамба тохоламбасеты, ӈамгэ’ то’’олха хасава манзая’’ таняӈа’’ тарцяха’’ си’’ми тидхалембасеты. Ӈавнанда Панаевскхана ӈацекы тохоламбадаӈэ манзаравысь. Небями хо’’махаданда выӈгана иле пэвэхэнзь. Небями ӈод’’ школахана ёльце сававна тохолковысь. Няндо’ сыраць маня’’ нюӈэ сава ненэцяӈэ вадываць, хусувэва’’ харта иландамда хось.
Хальмер’’ Седе хардахана ненэй ненэцие’’ школахана тохолкудамзь. Сяхаринда сельбя’ няна тиртя ӈаном’ ёльце ӈатесетыв, тохолковам’ ӈули’’ харвобтавась. Школахана сававна тохолкудамзь. Ӈодь яля’ няю’ ӈэда серкана нерня’ ӈэсетыдм’, школани президентӈэ тарадамзь. Пуна Тобольскан’ хаядамзь. Таняна ненэцие нядабава’ няю’ тохолкудамзь. Таняна ӈод’’ тэри нидм’ ӈамдёсету’’, хусувэй мэкад серо нерня’ минресетыдм’. Пуна яхани манзарванзь тодамзь. Тикаривна си’’ми ӈацекэхэ’’на хуркари мэкад серо минреванзь ханаць. По’ манзара’’махадани ӈацекы’’ хэвхана мэвам’ ӈули’’ сава серӈэ таславась. Мале тальцюна ӈацекы тидхалембадаӈэ си’’ми ханаць.
Тидхалембада ӈацекыда
Теда 27 группахана ӈацекэхэна манзарадм’. Пыдо’ 3 классахана мэна’’. Мал’ ӈэбато’ Ӈоя’, Тасу’ яв’ вы’ тер’’, ханяӈыдо’ Мессо яха’ няд ӈа’’. Ӈобаӈгуна ӈацекыни ненэй вадавна падвым’ толабиць, тамальӈгана тарем’ таславась, ӈока ханяӈы’’ ненэй вадамдо’ вэнзер’’ теневадо’. Толавыдо’ нидо’ хамедамбю’’. Ненэй вадамдо’ мэневандо’, теневавандо’ е’’эмня тарем’ таславась, лаханаком’ толава’ хавна тамна манэ’’лабтамба тара, тикахана хамедамбаӈгудо’. Тад тарем’ сертава’’, ненэся нянандо’ мэкад ӈэвы, тарабата харто’ тарана иӈуд хэтыби’’, си’’ми табедамби’’. Ты пэрти’’ сянакова’ яляхана небянахато’-нисянахато’ ӈоб’’ лаханаком’ манэ’’лабтаваць. Мал’ ӈэбато’ ӈули’’ маямбиць. Ӈацекыни’’ ӈод’’ лаханакомдо’ сававна манэ’’лабтавамдо’ хамеда’’махадандо’ ёльце пон маямбиць. Нянани мэна’’ ӈацекыни’ ӈобкартадо’ пуня’ ни ӈа’’. Сяхаӈгарт’ тэри ӈудида ня’’амбадам’ нидм’ манэцету’’. Нердена лаханакона’’ пуд тикан’ ниваць табалъй’’, тамна ӈани лаханако толаба, тасламба пяваць. Тарем’ Москван’ тэвываць. Таняна сидна’’ ӈани’ ненадумдаць.
Тюку ялэна’’
Сельбя’ няна ӈацекыни’’ хойхад то’’махадандо’ ӈэрм’ тер’’ сёбар’’ сянакубцаха’’ пыхыдадо’ вэнпаваць ядэлэйнась. Пыдо’ тарця серкана ӈули’’ пирӈадо’, пирдырмаха’’ нянандо’ ядэрцетыдм’. Сёбар’’ сянакубцха’’на мэбто’ сахаремба, нядаба ӈани’ серо’’ӈа. Ханяӈэхэна помнана’’ тэри лаханакурцетыва’’, теда’ мякдато’ то’’махадандо’ небянато’- нисянато’ хэвхана мэ’’мы иле’’мидо’ ваде’’ӈа’’. Хасава ӈацекы’’ лахарёдо’ — малкурма’, ханева’, поӈгарма’ нямна ӈэсеты’’. Нянани мэна’’ ӈацекыни’’ хой’ иландо’ саирм’ ёльце сававна теневадо’. Ханяӈэхэна нядандо’ ӈока ехэрана ӈавэ намдасетыдм’, мань нядандо’ ӈани’ тохолкудм’. Пыдо’ хэбяха’’ ӈамгэ ӈэвахад ӈули’’ теневавы’’. Тикыто’ нямна хой’ мяканандо’ сидто’ ӈули’’ тяхасовна тидхалембавы’’. Харто’ ӈод’’ хой’ нямна ӈэда лахарюна’’ ёльце харвобтэйдо’.
Сельбя’ няна нюртей ныланава’ яляхана тамина’’ хоян’ хаяваць. Вадахана халядава’’ хадабиваць, ӈодядава’’ ма’’ламбиваць, сянакуваць. Пэда’’махадандо’ нид лаханакурць тад нерня’ ӈамгэм’ пэрмава’’ тасламбиваць. Ӈамгэ’ то’’олха конкурсан’ ядэртава’’, по’ ямбан’ сертавандава’’ ӈока ӈэвы. Тарем’ вымна ядэрмам’ ёльце харвобтадо’, пыдо’ нянандо’ выӈгана мэнарахава’’. Сяхаринда тохолко то’’махадандо’ ӈахакуд яля’ ямбан’ ӈавэ пэрмава’’ тасламбасетыва’’. Ханзер’’ тохоковамдо’, ӈамгэ сава, вэвандо’ танявам’ мал’ ваде’’цеты’’. Ихинани хусувэй тидхалембада ӈацекэми мянувнанда ва’’лёй. Ӈопой тикамда тасла, ёльцяӈгананда манэць тара. Станислав Евай ненэй вадамда ёльце тяхасовна мэ’’ӈада. Ӈадьбята пыда сита ня ненэй вада’ нямна ӈэда конкурсхана мэни’. Таняна нерня’ ӈадиберӈани’. Москвахана сидни’ тенева’’. Богдан Лапсуй няби Корней Салиндер стихотворений ёльце сававна толаба пирӈаха’. Интернатхана илена’’ ӈацекыни’’ хавна тамна хар’’ни мяни тер’’ таня’’. Няхар’’ нюми. Ӈаркандо ю’’ пода. Манзаини ирмня нин юрыбю’’.
Ихинани, ӈацекэхэ’’на манзарава ёльце тарана сер’’. Ханзер’’ маня’’ тидхалеӈгуна’’, ӈарамбато’ тарця ненэцяӈэ ханда’’. Пыдо’ интернатхана сидна’’ небянато’-нисянато’ е’’эйӈэ мание’’, ӈадьбята маня’’ хусувэй яля’ варева’’ мэпана’’ серо’’ӈа.
М. Ярой’ падвы
