Нюртей хэвани мальӈгана

Пилю’’ иры’ пудана яляха’’на хой’ няна илена ӈацекы’’ сейдо’ няркомзеты’’. Тохолкованзь хардан’ хамекосеты’’. Мань ӈод’’ сяхаӈгав ӈани’ тарем’ си’’ми школан’ ханаць. Тамальӈгы ялэни тамна тензебтембасетын’.

Сыра’ няна си’’ив подани хэ’’мяхаданда, небями ма’’нисяв: «Не нюӈэ, ӈани похона ӈэрё’ няна тохолкованзь хандан’. Ӈацекы ма’’ламбада’’ тиртя ӈано тута». Тарця вади намда’’махадани ӈули’’ маямбидамзь. Школан’ ёльце харвадамзь. Тохолковам’ хаця хамэдамбивась. Паднабцям’ ня’’амба теневадамзь. Нябакоми нябимдей классахана тохолкусь, хардахана мэ’’мамда вадецетыда. Пыда паднабця, хуркари падро, книга тэволась. Хар’’ни ини сер’ падтаӈгосетыдм’, падна тоходадамзь. Тоенана падаркад небяни парквы буквы тохоламбидамзь. Нисяхаюни’-небяхаюни’ няна хабейма’ сер’ хардан’ тэворӈадамзь. Вы’ илна’’ хавна ӈани’ ехэрана ила танявам’ мале хамедамбивась. Янамбовна ини ӈылавна мале ӈанэдёда то’’олхадамзь.

Пилю’’ иры’ пудана яляха’’на тиртя ӈаном’ ӈатилӈаваць. Мя’’на’’ хэвувна ханцеты. Ӈоди ма’’ламба ядэрмани сер’ мунда намдорцетыв. Сейми тоялӈгасеты. Ихиняни манзетыдм’: «Тодакы? Тадхава ханданакэни’?»

Сяхаӈгав еся тиртя ӈано хубтахана ниняхана’’ тоса’’ мякана’’ ӈамдыць. Тэри лярцне, лямбортась. Няни ня’ нё’’ сивна маниеминзь. Небями ембадерони’ хамедамба пясь. Пыда тарем’ мась: «Тохолкованзь хандади’. Ембатади’!» Луци’’ не падро ня’’амба мят’ тюсь, нюбени хонрамбись. Пуна мякад мал’ тарпынаць. Тиртя ӈано’ мю’ мятюнинзь. Тиӈгота пэванда сер’ сидер’ сивня мядикоми пон маниеминзь. Сёнзяни мюй ӈули’’ вомась, мале тамальӈгана хамедамбивась — тохолкова тара! Мя’’ми, тыни’ тэри пуни’ хаиць.

Руфина Окотэтто’ падвы

Сидяӈг: М.Яр’ тадтавы

Авторы

Няръяна Нгэрм

08:14, 07 сентября 2024

Темы