Няръяна Ӈэрм
Нюрцямʼ сянакобц
Нюрцямʼ сянакобц
Илебей ненэцяˮ хуркари индоʼ ватовна ӈэда серо хомбиˮ. Таремʼ Ямальской районхы Панаевскʼ терˮ ныланаваʼ яляхана мэкад мутратна сянакобцхана сянакуˮ.
Юкад вата хасаваˮ сюдбяко телевизормʼ нядˮмяць футболхана сянакуць. Ӈокханда сиˮив командась, сиддоʼ сидяˮмана тярпиць. Няˮманда нядандоʼ нись ӈадюˮ тэрабиˮ, падроко нэкалпиˮ. Пирдыртиˮ поӈгана Виталий Яптик мэсь. Пыда нянда Евгений Худи еремысь. Пыдиʼ ӈулиˮ ваˮлёйхаʼ ӈэвэхэʼ, нядандиʼ вата ӈобˮ яӈговы. Пудандиʼ миндахаʼ — Андрей Яптик няби Константин Сэротэтто. Роман Пырирко няби Степан Окотэтто няхаромдэй янʼ хаˮамвэхэʼ. Виталиймʼ хонрамбидамзь, пыда маˮнисявˮ:
— Тюкумʼ мале школахана тохолковани мальӈгэхэд теневав. Яӈга пирдырмаˮ ӈадивоˮмаʼ пуд таминда таняʼ ханаць пэйваць. Евгенийʼ няʼ таремʼ сидяӈэ пирдырмамиʼ яӈгусь, торомбэй ӈэваниʼ, ниниʼ хамэдамбаваниʼ нирид нерняʼ хаˮмыниʼ. Ӈобˮ ёльцяӈгана тет ненэцяʼ сянаковаʼ мальӈгана сабе лэтё таравы.
Ханзерˮ сянако, хурка мутра тенева серопата? Неновна джойстикмʼ мэць тенева тара. Тикахана телевизорʼ мюмня сюрбертархаˮ ненэциекуд мячмʼ тапарпа тидˮ табедамбаӈгуд. Тандаяʼ тарця мутрамʼ няˮмавэхэнанд, мэць пявэхэнанд хамэдицяӈгу, хибяʼ ханяна сюрберма пунсяӈгу.
Нида маˮламбададоʼ — Андрей Яптик. Нюртей тарця киберспортивной турнирамда 2020 похона ӈадимдевэдась. Тамальӈгэхэд тикэмда етриʼ минреда.
— Ӈарка хардахад тоˮмани пуд, тохолковами малеˮмяхадани харˮн хардахани пуняʼ тодамзь. Манзаравани хавна ниниˮ еˮэмня пирдырми хамэдамбидмʼ. Нерня похона тет мэваʼ ӈобтʼ тэвасетынаˮ, тедаʼ сидяри маˮлюрӈаваˮ. Маˮлюрць ямʼ культураʼ мякана ходамзь, таняна манзаранаˮ сиˮми сававна нядабиˮ. Пирдырмаʼ нерцюˮ вадамʼ ӈэдарамбидмʼ, хибя харва, хибя пирӈада — малʼ тутаˮ. Школахана тохолкодаˮ, студентˮ, манзаранаˮ ненэцяˮ, тамна ӈаниˮ нянаˮ тэворцетыˮ.
Андрей пирдырмахана мэта ӈамгэмʼ, «приставка» нюбетамʼ тэвравысь, нита медаляд, ненадо падарт тэмдавысь. Ваць нерняʼ хаˮамвыдоʼ ӈудаʼ терхаˮна миˮмэдась.
Компьютермʼ нядˮмяць мэта сянакобц серта серʼ ӈаниʼ нюрцямʼ. Ӈытармиˮ Саляʼ терˮ ӈобтʼ тэворпатоʼ нидоʼ торомдамбиˮ, тикахад сава няӈэ ханˮӈаˮ. Ханяӈэхэˮна ӈобкана ненэй футболанʼ хандаˮ, ӈанихиˮна поӈгадамдоʼ пядаӈгуˮ, ханеӈгуˮ.
Анна Яптикʼ падвы
Авторы
Няръяна Нгэрм
Темы