Няръяна Ӈэрм
Ныхыдо’ ӈока
Ямалхана ныхыдырма’ сер’’ нерняри’ миӈа. Сававна мимада ӈока ненэцяӈгад пере. Сямянхат тю’’уд табекода федерация’ ватовна пирдырми Россия’ ханярина ӈадимдемби’’. Тарця серт’ нацекы ӈани’ тохоламбидо’.
Маня’’ яна’’ тер’’ нюдя ӈэдахандо’ ныхыдырмам’ тяхасовна торомдамбидо’. Яӈга сиддо’ тидхалембада’’ ненэциедо’ таня’’. Тарем’ Яр-Саля’ хардахана ныхыдырти тохоламбадаӈэ Артём Ного няби Сергей Рябов тараӈаха’. Пыди’ манзаямди’ инди’ ватовна тид’’ минреди’. Ныхыдырць тохоламбадиди’ хуркари’’ пирдырмаха’’ ӈэдарамбиди’, ядэлэйди’.
Ты’’ ниць иры’ 12 яляхана Саляӈгардан’ Артём Ного ӈаркамбой ӈацекы тэвравысь. Сидя яля’ пир’’ нылана’’махадандо’ Башкортостан Республикан’ ӈэдалэйдаць. Ханяӈы’’ сёбарда сяхаӈгарт’ таӈгун явна яландо’ ядэро’’мадо’, мерета тиртя ӈанохона тир’’мадо’ яӈгувысь. Нюртей мэва’ тарем’ хубта, ехэрана ян’, Уфа хардан’ пирдырманзь тэвавыдаць.
Таня’ Россия’ тиӈгывна илена’’ ма’’лёвыць. Тюку ӈобт’ ма’’лёвадо’ ӈули’’ ненадо. Россия’ тер’’ сёбар’’ серо тасламбада министерство’ хусувэй по’ пэрта сер’’ӈэ толы. Сидто’ пир’’ нито’ помна 12-17 пота’’ не ӈацекы’’, хасава ӈацекы’’, хасава’’, не’’ пирдырмыць.
Ямальской районхад ядэрмы’’ нина’’ ёльце варемдо’ мэ’’мыць. Ӈудандо’ терӈэ медаль тэвравыць. Езынги Витольда, Салиндер Константин, Худи Артём солотэй ненадумда’’ми ня’’мавыць. Парангуй Ева няби Вануйто Анатолий ненэй ненадумда’’ми ня’’мавэхэнзь. Шарифмуродов Александр няби Сэротэтто Савелий няхаромдэй ян’ ха’’амвэхэнзь. Сиддо’ тидхалембададо’ нюртей ян’ ха’’амвыць. Ныхыдырмандо’ мальӈгана саӈговодо’ сидто’ пир’’, по’’омнато’ сидто’ ӈар’’ няхато’ еребермыць.
Нюртей ядэрмадо’ ябдавы. Пирдырмандо’ мальӈгана нидо’ нядабавыдо’, нерняку’ тёрхана, вадахана пэрмыдо’. Сёнзито’ мюня няркнабто’ ӈод’’ сёбарна’’ сававна хамеко’’мамдо’, мэбе’’мамдо’ ӈадимдевы’’.
Автор: Анна Яптик’ падвы
Авторы
Няръяна Нгэрм
Темы